Israel-in khawmual lama Gaza ramri thunun vek tawh

Israel sipaite chuan Gaza-Egypt border-a Philadelphi Corridor chu an thunun belh leh tawh tih sawiin, khawmual lama Gaza Strip ramri zawng zawng chu an thununna hnuaiah a awm ta a ni.

Israel Defence Forces (IDF) thupuangtu, rear admiral Daniel Hagari chuan Gaza-Egypt border-a buffer zone-ah hian Hamas firfiakte'n Gaza-a ralthuam tawlh luhna atana an hman tunnel 20 zet an hmu chhuak tih a sawi. Philadelphi Corridor chu Hamas-hoin an mamawh hrang hrang, a bikin ralthuam tawlh luhna atana an hman ṭhin a ni tiin, tunnel an hmuh chhuahte chu an tihchhiat nghal vek thu a sawi.

Hetih lai hian Egypt chuan ramri kaltlanga leiverh siamte chu a hmain an lo tichhe vek tawh a, ralthuam tawlh luh theihna a awm lo niin a sawi. Israel-in leiverh an hmu chhuak nia an sawi chu Rafah-a beihpui an thlak mek an insawi thiamna hmanrua atana hmangah an puh ve thung.

Nikki Haley-i'n Israel missile-ah 'Finish Them' tih ziak

US-a Republican presidential candidate nih tuma lo chuh tawh leh, South Carolina governor hlui, Nikki Haley chuan Israel a tlawh ṭumin an ram hmar lam, Lebanon ramri an tlawhnaah, Israel missile-ah nuai bo vek rawh u, 'Finish Them' tih thu a ziah chuan sawi zui a hlawh hle.

Nikki Haley hi UN-a Israel ambassador hlui, Danny Danon chuan a ṭawiawm a ni. Israel-in Gaza Strip-a beihpui a thlak meknaah, Palestinian mi 36,000 chuang an thi tawh nia sawi a nih laia, hetiang karah hian Israel a thlawpna thu hi langsar takin a lo ziak lang thung a ni.

Haley hian a hma pawhin Israel a thlawpna thu leh, US president Joe Biden kaihhruai sorkarin Israel hnena ralthuam pek tur a dan chah lailawk avanga sawiselna thu te pawh a lo sawi chhuak fo tawh a ni. Israel prime minister Benjamin Netanyahu man a nih theihna tur leh, Israel-in insuatna a thlen nia puhna chungchang ngaihtuahtu, international criminal court (ICC) leh international court of justice (ICJ) pawh na takin a sawisel bawk. "America chuan Israel-in a mamawh ang apiang a lo tihsak tur a ni a, he indona a beih dan tur pawh a lo hrilh a ngai lo," tiin a sawi.