Hong Kong Court-in democracy activist mi 14 thiam loh chantir

Hong Kong court chuan nimin khan pro-democracy activist mi 14 chu China-in dan a siamsak hmangin thiam loh a chantir.

Court-in thiam loh a chantir zingah hian politician langsar tak tak Leung Kwok-hung, Lam Cheuk-ting, Helena Wong leh Raymond Chan-te an tel. Court hian mi 16 chhungthu ngaihtuahin, heng mite hi kum 2021-a sorkar hriatpuina tel loa primary election neihnaa inhnamhnawih mi 47 zinga mite kha niin, Hong Kong sorkar hnathawk thei loa siam tuma puh an nih bakah thuneitute a ruka paihthlak an tum tiin court chuan a tarlang. An chungthu ngaihtuah mi 16 zinga district councillor hlui pahnih, Lee Yue-shun leh Lawrence Lau erawh judge pathumte chuan an thiam lohna an hmu lo thung. He thubuai hi Hong Kong mipuite chuan an ngaihven hle a, Hong Kong chhunga national security case ngaihven hlawh ber niin Court thutlukna hre châkin mipui tam tak an pung khawm.

Hong Kong dan siamtu zinga democracy duhtute chuan 2019 khan an thil phût, democratic election neih leh police fel fai zawk neih theih nan rorelna fawng chelh tumin bei mah se, sorkarin legislative inthlan chu sawnsakin, an tum angin an awm thei ta lo a ni. Hemi hnu hian China ṭantu lamah dan siamtu tam zawk an awm theih nan inthlan neih dante tihdanglam niin, democracy duhtute chu Hong Kong chhungah hian an chep telh telh a ni.