Brazil-in Israel-a an palai UN-ah a sawn

Brazil president, Luiz Inacio Lula da Silva chuan Israel-a Brazil palai, Frederico Meyer chu Nilaini khan Israel aṭanga la chhuakin, United Nations-a special representative atan a dah thu a puang.

Brazil-in Israel-a an palai an sawn chhuah chungchangah hian Brazil leh Israel inkara inhmuh thiam lohna awm vang nia ngaih a ni. Brazil-a Meyer koh let a nih hma hian Israel foreign minister, Israel Katz chuan Meyer hi koin, Brazil president Lula chu middle east ramah te lawm a hlawh tawh loh thu a hrilh. Hei hi Lula-a'n Israel-in Gaza a beih chu Germany-a Juda-te suatna (Holocaust) nen a tehkhin vanga Israel-in an chhan letna a ni.

President Lula hian Frederico Meyer hi thla khat vel liam ta khan Brazil-ah a ko let tawh a, hemi hnu hian Israel-ah hian a let leh tawh rih lo a ni. Tunah hian President Lula chuan Israel-a Brazil palai hna a thawhna dinhmun aṭangin United Nations-a special representative lamah a sawn ta thung a ni. Frederico Meyer hi United Nations bakah khawvel huap pawl hrang hrangah Brazil aiawh a ni nghal dawn bawk. Brazil foreign relation ministry chuan Israel-a an ram palai tur hi a thar an ruat tur thu an puang tawh a, palai thar ruat a nih hma chuan Israel-a an embassy chu ambassador aiawha ruatin a enkawl rih tur thu an sawi bawk.