Colombia president hlui house arrest aṭangin chhuah zalen

Colombia president hlui Alvaro Uribe chu kar liam ta Inrinni khan house arrest-a hren a nihna ṭangin chhuah zalenna tur chu  Colombia judge-in a tichhuak. 

Judge thupek avang hian Uribe chuan a twitter lamah Pathian hnena a lawm thu a sawi nghal. 

Kum 2012 aṭang khan Uribe hi Supreme Court chuan a chhui ṭan a, Uribe hi thamna laah te puh a nih bakah, right-wing paramilitary  nena inzawmna neia puh a nih chungchanga finfiahna awmte tichhiaah puh a ni. Uribe hi Colombia president hlui zinga man hmasak ber a ni a, mahse an puhnate hi thu dik lo  niin a sawi a, finfiahan pawh a la awm lo a ni. 

Kumin August thla khan an ram Supreme Court of Justice chuan house arrest in a tan tir a ni. Court thutlukna hi Uribe thlawptute chuan an sawisel nasa hle. House arrest-a hren a nih vang hian Uribe chuan senate member a nihna aṭangin a ban phah bawk. 

Mahse Municipal Judge Clara Salcedo chuan a thubuai ngaihtuah a nih chhungin Uribe hi khung beh kher a ngai lo nia sawiin, house arrest a nihna aṭanga chhuahna tur thupek hi a tichhuak a ni. 

Kum 2002-2010 inkar khan Uribe hi Colombia president a lo ni tawh ṭhin a, a president hun lai kum 2006 khan an rama right-wing paramilitary group, United Self-Defense Forces of Colombia (AUC) nen peace accord an ziak a, hei vang hian fak a hlawh hle. 

Hetih lai hian thuneihna a chan chhung hian mihring dikna chanvo palzut nasaah puh a ni bawk a, a rorelna hnuaiah sipai officer-te chuan mi rethei zawkte tam tak tihlumin, hmingṭhat an hlawh theihna atan heng an tihhlumte hi hel angin an chhuah fo nia sawi a ni.