Israel-in 'All Eyes on Rafah' thlalak a chhang let ; 'Where Were Your Eyes on October 7'

Israel-in Gaza Strip-a Hamas firfiakte laka beihpui a thlak mekah, Palestinian thlawptute chuan Israel an demna leh Palestinian mite thlawpna lantirin, AI hmanga thlalak siam, 'All Eyes on Rafah' tih chu social media lamah an thehdarh nasa hle. Hei hi Israel chuan chhang let vein, nikum October 7-a Hamas-te'n Israel an beih chungchang tarlanna, "Where were your eyes on October 7" tih thlalak, ralthuam keng Hamas firfiak hmaa nausen pakhat ṭhu lai thlalak an rawn thehdarh ve nghal.

Israel-in thlalak an thehdarha nausen thlalak an dah hi Kfri Biba, thla kua mi niin, Hamas-te'n Israel an beih khan a nu leh a unaupa nen manin, an hreng zui a ni.

Gaza Strip chhim lam, Rafah khawpuia Israel-te'n beihpui an thlaknaah tent camp bei telin, civil mi 45-in an thih phah a, he thil thlen thlen hnu hian Israel chet dan demna thu hi a rawn darh a ni. 'All eyes on Rafah' tih thu hi X lamah rawn post-in, Palestinian thlawptute'n nasa takin an thehdarh zui a, social media lamah a viral nghal a ni. He post hi Instagram, Facebook, Tiktok leh social media site dangah share mtd 47 chuang zet a awm hman. Celebrity lamin an share nasa a, an zingah hian - Dua Lipa, Gigi leh Bella Hadid leh Lewis Hamilton te pawh an tel. X lamah hashtag #alleyesonrafah chuan million hit dawn a nei pha bawk. Israel demna thu, 'All eyes on Rafah' thehdarhna kawngah hian Iran chu a hma latu pawimawh tak nia sawi a ni.

'All Eyes on Rafah' image viral hi Israel chuan X lamah rawn chhang ve nghalin, October 7-a Hamas-te'n Israel mite chunga pawikhawihna rapthlak tak an thlen chu sawi lan a ni ve ngai lo tih a rawn tarlang a, 'Keini chuan October 7-a thil thleng chungchang kha kan la sawi reng dawn. An mi hren mekte tan kan bei zel dawn a ni," an ti. Israel Foreign Ministry pawhin India-a Israel embassy post, 'Hamas-te'n an mi hren mek, Israel mi, hmeichhia leh naupang, kum upa zawkte'n Gaza-a leiverh chhungah hrehawm takin hun an hmang mek a, an mangang au awte erawh chu in mitin in hmuh hmaih leh si,' tia X lamah a post chu post chhawngin, 'Hei hi buaina inṭanna a ni. Comment i siam hmain thil thlen dan dik tak hriat hi a pawimawh hmasa ṭhin a ni. Hamas mi hrente kan chhanchhuah vek a, an in ngeia kan hruai kir leh hma chuan kan chawl dawn lo," tiin a sawi zui bawk.

Hamas-te'n October 7, 2023-a Israel chhim lam an beih thut ṭum khan mi 1,189 an that a, mi 252 manin an hreng zui bawk. An mi hren zinga eng emaw zat chu chhuah ni tawh mah se, tun thlengin mi 121-te chu an chin hriat an la ni lo a, Israel chuan heng zinga mi 37 chu an thi tawh nia an hriat thu a sawi. Hamas-te'n Israel an beih leh, mi tam tak an man avang hian Israel chuan Hamas rorelna, Gaza Strip bei zui nghalin, tun thlengin an la inbei chhunzawm ta zel a ni.

IG-in Israel thlalak  siam paihsak

'Where Were Your Eyes on October 7' thlalak hi Israel mi, Benjamin Jamon siam a ni a, a thlalak siam hi Instagram-a a post hnu lawkah paihsak a ni a, a instagram account pawh tihtawpsak a ni zui nghal niin Times of Israel chuan a sawi bawk.

Hemi chungchangah Instagram neitu, Meta chuan insawi fiahna mumal a la nei lo a, an en fiah mek thu leh, tihsual palh vanga thlalak pawh hi paihsak nia a lan thu a sawi a, 'A thlalak dah hian kan policy kalhna engmah a nei lo,' a ti.

Indona hian thla sarih dang a la awh mai thei - Israel

Ram hrang hrangte'n an sawisel mekna karah, Israel chuan Gaza-a inbeihna chu a la tawp mai dawn lo a, Hamas nena an indona chuan thla sarih vel tal a la awh mai thei niin a sawi.

Israel national security adviser, Tzachi Hanegbi chuan kum 2024 chu Israel war cabinet chuan hmelmate beihna, 'year of combat' atan a puang tih sawiin, '2024 thla ngana kan hmang zo dawn a, hei vang hian thla sarih dang pawh kan thil tum, Hamas leh Islamic Jihad sipai leh sorkar nuai bona tihhlawhtlinna turin kan la hmang dawn a ni," a ti. Israel sorar hian Hamas nena an indo meknaah hnehna pumhlum channa tur chuan Rafah-a firfiakte nuaibo a ngai tel a ni tih sawiin, Rafah-a an indona chu a hmawr bawkna tur a ni dawn tih an sawi a ni.