Donald Trump thiam loh chantir

US president hlui, Donald Trump chu Ningani khan New York jury chuan kum 2016 inthlan dawna porn star pakhat ka hupna atana sum a pek chungchang thupna atan document dik lo siama puhnaah thiam loh a chantir.

Member 12 awmna jury hian Trump puhna hrang hrangte hi ni hnih chhung an ngaihtuah hnuah, thil dik tawk lo tia puhna 34-ah thiam loh an chantir vek a ni. July 11-ah hremna puan a ni dawn tih justice Juan Mechan chuan a sawi. Hei hi kumin US President thlanna neih turah Republican Party-in an official candidate atana Trump an puan hma lawk tur a ni.

Document dik lo siama puha thiam loh chantir hi kum li thleng lung in tan theih an ni a, mahse, a tam zawk chu hei aia rei lo emaw tantir, pawisa chawitir emaw te an ni ṭhin. He puhnaah hian Trump hi thiam loh chantir ni mah se, President inthlan chuh a tumnaah a tibuai lo a, campaign emaw, thlan tlin pawh ni se President office a luahna a dal dawn lo a, hremna puan a nih hmain jail-ah dah a ni lo bawk ang.

Kum 77 mi, Donald Trump hi US President ni tawh zingah thil dik tawk lo tia puhnaa thiam loh chantir hmasa ber a ni. Trump chuan tih dik loh engmah a nei lo tih a sawi thung a, a attorney pawhin a rang thei ang berin an appeal dawn tih a sawi.