Biden-a'n inkahhai puanna tura rawtna a siamte puang
Gaza Strip-a Israel leh Hamas indona thleng meka inkahhai puan a nih theihna atan US president Joe Biden chuan rawtna leh ruahmanna a siamte a puang a, Hamas lam chu he rawtna hi ṭha taka lo dawngsawng tura a duh thu a sawi nghal bawk.
President Biden chuan Zirtawpni liam ta zan khan rawtna hi puangin, 'He indona hi tihtawp a hun tawh takzet a ni," a ti. Inkahhai puanna tura rawtna a siam hi thawh thuma siam niin, a thawh hmasa berah chuan kar ruk chhung inkahhai puan phawt a, hemi chhung hian Gaza hmun laili aṭanga Israel siapite lak chhuah a, Hamas-te'n an mi hren mek, kum upa zawk leh hmeichhiate chhuah a, Israel-a Palestinian mi tang mek eng emaw zat chhuah rawt a ni bawk. 'A thawh khatna chhung hian Palestinian civil mi, indona avanga tlanchhiate chu Gaza-ah an kir leh ang a, ni tin chhawmdawlna phurtu truck 600 tirh luh a ni bawk ang," tiin Biden chuan a sawi.
Rawtna a siamah a thawh hnihaah, Hamas leh Israel chuan inremna tluantling a awm theihna atan inbiakna an nei ang. "Inbiakna neih chhung chuan inkahhai puan chhunzawm zel a ni ang," tiin, a thawh thumnaah chuan indona avanga Gaza-a thil chhe hrang hrangte din thar lehna tur telh a ni bawk.
Biden chuan,"Israel-ah he rawtna siam duh lo hi an awm ngei ang a, indona chu chhunzawm zel turin an ti ang. An zinga ṭhenkhat chu ṭangrual sorkara tel pawh an ni ang. Sorkar pawh an nawr na viau ang. Mahse Israel hruaitute chu eng anga nawrna pawh tawk mah se, nghet taka dinga, he rawtna hi pawm turin ka duh a ni," a ti.
Hamas nuai bo hma chuan inremna tluantling a awm dawn lo : Netanyahu
US President Biden-a'n inkahhai puanna tura rawtna thar a siamte a puan hnuah, Israel prime minister, Benjamin Netanyahu chuan Hamas firfiakte chu nuai bo an nih hma chuan Gaza Strip-a inkahhai puan a, inremna tluantling siam a theih dawn loh niin a sawi ve thung.
Netanyahu chuan,"Indona tihtawp chungchanga Israel ngaihdan chu a la danglam lo. Hamas firfiakte leh an hmunhmate tihchhiat vek a, an mi hrente chhuah zalen leh, Gaza chu Israel tana hlauhawm loa a awm phawt a ngai a ni," a ti. Inkahhai tluantling puan a nih hmain hengte hi Israel chuan tipuitling turin a phût zel dawn a ni, tiin a sawi. Israel hian Hamas-in Gaza-a thuneihna an chelh chhung chuan indona hi a tawp tak tak thei dawn lo tih a sawi a ni.
Hetih lai hian Israel leh Hamas inkara palai hna thawktu, US bakah Egypt leh Qatar chuan President Biden rawtna siam hi pawm turin Israel leh Hamas te an ngen. Inkahhai puan chu Gaza mipuite harsatna tawh mek chhawk theihna tur leh, Hamas mi hren mekte leh an chhungte hahdamna thlen theihna tur a ni, an ti.
Biden-a rawtna pawm chuan Minister 2-in ban an tum
Israel finance minister Bezalel Smotrich leh national security miniter Itamar Ben-Gvir te chuan President Biden-a inkahhai rawtna hi prime minister Benjamin Netanyahu-a'n a pawm a nih chuan, minister an nihna aṭanga banah an vau.
Itamar Ben-Gvir chuan, 'He rawtna hi indo tihtawp rawtna a ni a, hei hi kan pawm chuan Hamas tihchhiat tumna kan hmalakna chu kan thlauhthla dawn tihna a ni. Inremna ṭha lo tak, firfiakte tana hnehna leh, Israel himna tihderthawnna tur a ni," a ti. He rawtna pawm ai chuan, sorkar ṭhiah mai pawh a duh zawk dawn tih a sawi.