NKorea-in SKorea-ah bawlhhlawh dahna balloon thawn belh leh

North Korea chuan a ṭhenawm, South Korea ramah bawlhhlawh dahna balloon 600 chu a thawn luh belh leh niin nimin khan South Korea chuan a sawi.

NKorea-in a hmaa balloon a thawn luhah khan bawlhhlawh chi hrang hrang bakah mihring ekte pawh a thun tel nia sawi a ni.

SKorea Joint Chiefs of Staff chuan an ram huna Inrinni zan dar 8 - 10 inkar khan NKorea aṭanga thawn luh, bawlhhlawh awmna balloon hi an ram khawpui, Seoul leh a chhehvelah a tla darh leh nasa hle niin a tarlang. Heng balloon-ah hian cigarette bung, thawmhnaw chhia, paper leh plastic chhiate an dah. NKorea chuan hetianga bawlhhlawh dahna balloon a thawn luh hi SKorea-in NKorea ram chhunga an ram inrelbawlna sawiselna leaflet a thawn luh ṭhin a chhan letna niin a tarlang.

Seoul khawpui bakah, Gyeongsang leh Gangwon province-ah emergency tih chhuah niin, mipuite chu balloon rawn thlawk lut laka fimkhur tur leh, an hmu a nih chuan thuneitute hriattir nghal turin an ti. He thil thleng avang hian nimin tlai khan South Korea-a National Security Council standing committee chu ṭhu khawm nghalin, hma lak dan tur an ngaihtuah.