Taliban-in an pawl hotu thar tur puang

US sipaiten drone hmanga Balochistan, Pakistan-a beihpui an thlaknaah Taliban pawl hotu, Mullah Mansour a thih hnuin an pawl hotu thar an ruat nghal.

Kar kalta Inrinni-a Mansour thah a nih hnua a vawikhatna atan Taliban chuan nimin khan thuchhuah siamin, an pawl hotu a thih thu hi an nemnghet a, hemirual hian amah thlaktu atan Mawlawi Haibatullah Akhundzada ruat a nih thu an puang.

Mansour hi Taliban dintu leh an hotu Mullah Mohammd Omar a thih hnuah kum 2015, July thla khan an pawl hruaitu atan dah a ni. Amah thlaktu atana ruat, Mawlawi Haibatullah Akhundzada hi sakhaw lama an mi thiam neih a nih bakah, Taliban court hruiatu hlui a ni a, Afghan Taliban deputy leader zinga mi a ni.

Taliban thuchhuah chuan an pawl hotu thar atana Akhundzada ruat a nih bakah, Mullar Omar-a fapa Mullah Mohammad Yaqoob chu joint deputy head atan ruat a ni bawk niin an tarlang.

Mawlawi Haibatullah Akhund≠zada hi kum 50 chuang tawh, Kandahar province-a Panjwai district mi a ni a, lehkha thiam leh Taliban member-te pawhin an zah tak nia sawi a ni. Afghanistan sorkar leh Taliban-ten inremna kawng zawnga inbiakna an neih turah pawh nghawng ṭha zawk a neih rin a ni.