Nigeria state-ah tomato emergency puang

Nigeria hmarlama Kaduna state-ah rannung chi khatin an tomato chin zinga 80% zet a eichhiat avangin state of emergency an puang.

Agriculture Commissioner Daniel Manzo Maigar chuan farm-a tomato chin te chu rannung chi khat, Tomato Leat Miner tia an vuah, Tuta Absoluta tih bawk chuan 80% zet a ei chhiat sak tawh tih a sawi. Hei vang hian tomato man pawh basket khat dollar 1.20 ni ṭhin chu dollar 40 chuangah a sang tawh niin a sawi.

Official-te chuan rannungin a ei chhiat nasat avanga harsatna an tawh mek chinfel dan ngaihtuah a nih theih nan emergency hi puan a nih thu an sawi. Kano state-a tomato paste siamna neitu, Africa rama mi hausa ber Aliko Dangote chuan tomato an mamawh ang an hmuh theih loh avangin an thil siamchhuah hna pawh tun thla tir aṭang khan an chawlhsan tawh tawh tih a sawi.