EgyptAir thlawhtheihna tla zawng chhunzawm zel

EgyptAir thlawhtheihna, Fligth MS804 chu kar kalta Ningani khan Paris aṭanga Cairo pana a thlawh laiin a tla a, he thlawhtheihnaah hian mi 60 an chuang a ni.

Thlawhtheihna hi Mediterranean Sea-ah a tla a,kar kalta Zirtawpni khan Egypt sipaite chuan Alexandria khua aṭanga hmarlam km 290 vela hlaa tuipuiah thlawhtheihna them leh a chuangte bungraw
ṭhenkhat bakah taksa peng ṭhenkhat an hmuh thu an puang a, hei bak hi thil dang hmuh belh an la nei lo.

Egyptian investigation committee leh forensic thuneitute chuan an thil chharte hi uluk taka enfiah a nih thu leh, taksa peng an hmuh pawh Cairo-a Zeihom morgue-ah dah a ni a, thlawhtheihnaa chuangte chhungte DNA sample lain tunge a ni tih hriatchhuah tum mek a ni tih an sawi.

EgyptAir thlawhtheihna chetsual chhan hi hriatchian a la ni lo a, expert-te chuan a tlak chhan hi thil pali a awm thei tih sawiin, a khalh≠tute tihsual vang, khaw ṭhat loh vang, khawl lam ṭhat loh vang leh firfiakte beihna vang a ni thei tih an sawi. Mahse Egypt Airports Company chairman hlui, Gadel-Karim Nasr chua, "Chetsualna thlen chhan ni theia lang, a hmasa pahnihte hi a dik kan ring lo. A chhan chu a thawktute chi mithiam tak tak an ni a, tihsual an neih kan ring lo a, hei bakah hian thlawhtheihna tana hlauhawm turin khua a chhe lo a ni" a ti.

Flight MS804 hi feet 37,000-a sanga a thlawh laiin biak zui theih lohin a awm a ni a, a hnuah a hnuai≠a Mediterrean tuipuiah a tla tih hriat zui a ni ta a ni.