Israel PM leh Lieberman-an thawhhona tur inremna ziak

Israel Prime Minister Benjamin Netanyahu leh Yisrael Beiteinu party hruiatu, Avigdor Lieberman chuan thawhhona tur inremna an ziak a, Lieberman hi Defence Minister nihna pek a ni nghal a ni.

Yisrael Beiteinu hian PM Ne≠tanyahu-a kaihhruai ṭangrual sorkar an zawm ve leh dawn tak avangin sorkar hian Parliament member 120 awmnaah thlawptu member 66 a nei thei tawh dawn a ni.

Thawhdunna tur inremna thuthlung an ziah hnua chanchin thar lakhawmtute a kawmnaah, Netanyahu chuan, "Hmasawnna thleng zel hian kan tan pawh chona thar a siam ve zel a ni. Heng hmasawnnate hian remna leh muanna a awm theihna tura remchang an siam belh zel a, heng hun remchangte hi hman ṭangkai zel kan tum. Hemi atan hian sorkar lian leh nghet zawk tan chuan thiltih a awlsam dawn a ni" a ti.

Netanyahu hian Beiteinu party chu thawhpuia sawm a, an hruaitu Lieberman chu defence minister-a dah a tiam avangin kar kalta khan Moshe Yaalon chu defence minister aṭangin a lo bang tawh a ni.

Avigdor Lieberman hi ṭawngkam hriam thei tak a ni a, sorkar pawh hi na takin a lo sawisel fo tawh a, politics lamah pawh thawm a nei lian thei hle. Defence Minister-ah dah tura rawt a nih lai pawh hian Netanyahu-a party, Likud Party member ṭhenkhat chuan sawiselin, security lam buaipui tur chuan tawnhriat a nei ṭha tawk lo niin an sawi. Kum 57 mi, Lieberman hi Soviet Union-a piang niin, kum 1979 khan Israel-ah hian an pem lut a ni. Israel army-ah ṭangin, corporal a ni ṭhin. Kum 1996-ah politics-ah lutin, Netanyahu-a term hmasaah khan prim minister office-ah director-general a ni.

Kum 1999 khan Lieberman hian Yisrael Beiteinu party hi a din a, kum 2006 khan Ehud Olmert-a kaihhruai ṭangrual sorkarah telin, deputy prime minister a ni. Hemi hnu, kum 2009-2015 chhung khan Netanyahu hnuaiah foreign minister a ni leh bawk.