Zimbabwe president thlawptuten kawng zawh

Zimbabwe khawpui, Harare-ah rorellai Zanu-PF youth wing huaihawt President Robert Mugabe thlawpna lantirin mi tam takin kawng an zawh. Kawng zawhnaa kal tur hian ramchhung hmun hrang hrang aṭangin an ram khawpui hi an pan khawm a ni.

Zanu-PF hian President Mugabe puala kawngzawh buatsaihah hian mi maktaduai khat koh khawm an tum thu sawi mah se, an tling zo lo.

Kawngzawhte chuan Mugabe an thlawpna thute an aupui. Kawngzawh hi thla hmasaa eptu pawlten president ban phuta nawrh an huaihawt chhan letna atana an tih a ni.

Kum 92 mi, Mugabe chuan kawngzawhnaah hian thu sawiin, an party chhungah amah dodaltu an awm nia thu thang chu a duh loh thu a sawi. Mugabe chuan, "Ro hran rel tum pawl an awm hi a ṭha lo. Heng pawlte hian party an tichhe ṭhin a ni" a ti. A nupui, Grace Mugabe pawhin thu a sawi a, President Mugabe chu thlak mai theih anih loh thu leh, Zanu-PF chuan Zimbabwe-ah ro a rel zel tur thu a sawi.

Rorellai party-in kawng≠zawh a buatsaihna atan hian dollar nuai 500 vel zet an seng nia sawi a ni a, hei hi eptu lam chuan mi retheite sem zawk se ṭha an tih thu an sawi. Eptu pawl, Movement for Democratic Change (MDC) party hruaitu, Nelson Chamsa chuan sum leh tha tam tak senralna mai mai a ni, a ti.