US President-in Hamas leh Israel hotute inremna nei turin a nawr

United States president Joe Biden chuan Hamas leh Israel hotute chu inremna chhawng thum an chhawp chhuah pawm tura a duh thu a sawi a, inremna hi a pawm thei a nih chuan Israel mi hren mek leh Palestinian tang mekte chhuah zalen an nih bakah thla riat dawn indona thlenna, Gaza-ah remna tluantling a awm phah thei dawn niin a sawi.

President Biden hian inkahhai puan a nih theih nana Israel rawtna chu puangzar in White House national security spokesman, John Kirby chuan US President chuan inbiakna neih kawnga an kalphung thlak danglam a duh a, mipuiten inremna nei tura an thlen chin chu hre ve se an tih vang a ni tiin a tarlang.

Hamas lamin an mi hren mekte an zavaia chhuah an phal chuan Israel hian inkahhai puan an pawm bakah, Gaza aṭangin a tahtawlin an sipai hnuhkir pawh an duh tiin Biden chuan a sawi. G7 pawhin Biden-a'n inkahhai puang tura rawtna a puan chhuah hi an thlawp tih tarlangin, Hamas pawhin an pawm ngei an beisei thu an sawi ve bawk.

Israel mi, Hamas ten an hren mek an chhuah theih nana nawr tura mi tang chhungte din, Hostage Forum chuan Israel sorkar chu inkahhai puang tura rawtna awm pawm tura an duh thu sawiin, mi tang thi an awm belh zel chu a tawp a ngai tih an tarlang. Mi tang thah takte thih dan chu thil zahthlak tak a ni tiin, Israel sorkarin inkahhai puan an tihkhawtlai vangah an puh a, sorkar chuan Hamas nen inremna nei thuai se an duh thu an sawi. Hetih lai hian Israel sipai thupuangtu, Rear Adm. Daniel Hagari chuan mi tang thahte chu tun hnaia thleng ni loin, Khan Younis an beih ṭuma thleng a ni tih a sawi a, an ruang chu Hamas kutah a awm mek tih a tarlang.

Hamas mi hren zinga 4 an  thih belh leh

Hamas firfiakten October 7, 2023-a Israel an beih ṭuma an man zinga mi pali an thih belh leh tih Israel sipaiten an sawi.

Israel sipaite hian June 3 zan khan mi pali thih thu hi an puang a, an zingah hian a hmaa Hamas-ten video an tihchhuahah lang mi pathumte an tel. Hamas kutah hian an mi man zinga mi 80 vel chu an nungdamin an la awm mek nia hriat a ni a, heng mite bakah an mi man zinga mi 43 ruang pawh an la kawl bawk.