SKorea-in NKorea nena sipai inremna an neih a titawp

South Korea prime minister Han Duck-soo chuan North Korea nena kum 2018-a military agreement an ziah chu an titawp tih a puang.

NKorea hian balloon-a bawlhhlawh dahkhawm chu SKorea ramah an thlawh luh tir ṭhin a, hei vang hian SKorea hi a lungawi lo hle a, an ṭhenawm ram chetdan chu an an ram tana thil hlauhawm a ni tiin, ram pahnih sipai inremna hi an titawp a ni.

SKorea leh NKorea inremna ziah hi ram pahnih inremna kawng an zawn laia ziah a ni a, ramria sipai ṭhahnem tak dah lo turin inremna hi an siam a ni. Nikum November thla khan NKorea-in spy satellite an kah chhuah avangin SKorea hian an inremna ziah ṭhenkhat aṭangin an inhnukdawk tih an lo puang tawh bawk. Tunah hian NKorea in bawlhhlawh ton 15 zet chu balloon hmanga an thawn luh avangin inremna hi a pumin an titawp tih SKorea chuan an puang ta a ni.

North Korea Vice Defense Minister, Kim Kang Il chuan bawlhhlawh dahna balloon thawn luh hi titawp lailawk mah se NKorea aṭanga tlanchhia, SKorea-a lutten an ram lam hawia balloon an chhuah leh a nih chuan bawlhhlawh paitel balloon chu an thawn leh dawn tiin a sawi.

SKorea in ramria sipai tam tak dah lo tura inremna an tihtawp takah chuan ram pahnih ramriaah sipai tam zawk tirh luh belh a nih ngei a rinawm. SKorea hian ramriah silai kah inzirna an nei leh ṭan tawh a, hemi bakah hian au rinna hmangin an thuchah tihdarh hna an ṭan leh tawh avangin, NKorea hian an chhan let ve ngei a rinawm hle bawk.