Australia-in ram dang mi an ram sipaiah ṭan phal dawn

Australia chuan an ram venhimna tura sipai thuam chak tumin hma la mah se, an ram mi leh sa sipaia ṭang duh an tlem zel avangin Australian Defence Force (ADF) chuan ram dang mi tan Australia sipaiah a ṭan theih dawn tih a puang.

Australia hian New Zealand khua leh tui, Australia-a inbengbelte chu July thla aṭangin an ram sipaia ṭang turin a lo phalsak tawh a, nakkum aṭangin United Kingdom, United States leh Canada khua leh tuite chu an ram sipaia ṭan a phal sak leh dawn bawk.

Minister for Defence Richard Marles chuan sipai ṭang thei tihdanglam a nih chhan sawifiahin, an ram venhimna ṭha zawk an neih theih nana hma la an ni tih a sawi a, hun lo kal turah Australia tan a la ṭangkai dawn tih a sawi bawk. Marles chuan Australia leh New Zealand-in 'Anzac bond' an neih thu sawiin, indona chu an hmachhawn dun ṭhin a ni, a ti.

Australia hian ram an tarlan bikte bakah hian an ram chhunga kum khatcheng tawh (permanent resident) leh ramdang tana sipai la ṭang ngai lo tu pawhin Januay 1, 2025 aṭang chuan sipai ṭan nan dilna an theh lut theih tawh dawn tih an puang bawk. Australia hian tuipui ramriah China nen buaina an neih avangin an sipai thuam chak tum hian hma a la mek a, mahse ramchhungah ṭhalai hna nei lo an tlem avangin an duh angin sipai ṭang duh an hmu tam lo a ni.