Slovenia-in Palestine ram an pawm ve leh ta

Slovenia chuan Palestine chu ram angin a pawm ve leh ta a, Parliament-ah hemi chungchangah hian vote lak niin ram anga pawm duhna motion put luh chu a tlang a ni. Slovenia hi tun hnaia Europe ram zinga Palestine ram anga pawmtu palina niin, an hma hian Spain, Norway leh Ireland chuan an lo pawm tawh a ni.

Slovenia prime minister Robert Golob chuan ram anga Palestine pawm chu tun hnaia an ngaihtuah thar chauh ni loin, February thla aṭang khan an ram ṭhianṭhate nen hemi chungchang hi an sawi ho ṭan tawh niin a sawi. "Mahse khang hunlai khan hun an la tih rih loh avangin hmalakna a awm zui ta lo mai a ni," a ti.

President Golob chuan Slovenia leh Palestine dinhmun tehkhinin, an ram pawh chu Yugoslavia aṭangin kum rei tak chhung zalenna neih tumin an bei a, kum 33 liam ta khan an hmu ve thei chauh niin a sawi a, Palestine-in zalenna an la hmu ve lo chu pawi a tih thu a sawi bawk.

Slovenia Parliament-ah hian June 4, Thawhlehni khan Palestine ram anga pawm tura tihna motion hi put luh niin dan siamtu mi 90 awm zingah mi 52 in an thlawp a, a bak zawng erawh vote lak lai hian an awm lo thung.

Slovenia foreign minister Tanja Fajon chuan Slovenia thutlukna chu Palestine mipuite tana beiseina siamtu a nih bakah remna an neih theih nana pawimawh tak a nih ngei a beisei tih a sawi. Fajon chuan Israel leh Palestine buaina chin fel dan awmchhun chu ram pahnih din mai a ni tih sawiin, Slovenia chuan ram pahnih a din theih nan an bei zel dawn tih a sawi bawk.