Ukraine sipai hrual tumna Russia-in a chhang let

Russia chuan khawthlang ram sipai, Ukraine sipai training petute chu an dim dawn lo tih a tarlang. Russia-in hetiang thuchhuah a neih chhan chu Ukraine sipai hrual tura France military instructor-te tirh luh tumna thawm a awm vanga ngaih a ni.

Kar liam ta khan Ukraine army chief Oleksandr Syrsky chuan France sipaite chu an ram sipaite training pe turin Ukraine-ah an lut ṭep tawh niin a sawi a, a hnuah erawh hemi chungchangah hian inbiakna kal lai mek a nih thu sawi leh mah se Russia chuan a chhang let ta tho a ni.

Russia sorkar thupuangtu Dmitry Peskov chuan Ukraine sipai hrual tura ram dang aṭanga lutte chu Russia beihpui thlak chuan a kal kan dawn bik lo tih sawiin, France an ni emaw ramdang emaw mi tupawh Russia chuan a dim dawih dawn lo tih a sawi.

NATO hnuaia ram dangte ang lo takin France hian Ukraine pui turin an ram sipai Ukraine-a thawn luh mai an hnial lo tih a lang a, Russia aṭangin vauna tawk reng mah se France president Emmanuel Macron chuan Ukraine-a sipai tirh luh chungchangah thil theih loh a ni lo tih a lo sawi tawh a ni. Tun dinhmunah erawh France hian Ukraine-ah hian sipai a la tir lut loh thung a, France leh khawthlang ram dangten Ukraine sipai pui tura an sipaite an tirh luh chuan Russia chuan khawthlang ram sipaite bakah an hmanrua pawh a dim sak dawn lo tih an lo sawi tawh a ni.