Israel-in Gaza a beihnaah mi 30 an thi

Palestinian health official chuan Israel-in Gaza Strip laili laia sikul, chhawmdawlna in atana an hman tak a beih avangin mi 30 an thi a, an zingah naupang panga an tel tih a sawi. Hetih lai hian Israel chuan he sikul chhung hi Hamas firfiakten tawmna atan an hmang tih a sawi ve thung.

Gaza-a sikul beihna hi Israel sipaiten van lam leh lei lam aṭangin beihpui a thlak leh dawn tih a puan hnu lawka thleng niin sikul hlui, chhawmdawlna in ni ta aṭang hian ruang 30 Al-Aqsa Martyrs damdawi-inah a thleng tawh a, hemi bakah hian hmun danga inkahnaa thi mi paruk ruang damdawi-inah hian dah luh a ni bawk.

Israel sipai thuchhuahah chuan an indo thlawhtheihna pakhatin United Nations agency for Palestinian refugees (UNRWA) enkawl sikul pakhat a kap fuh tih an tarlang a, he sikul hi Hamas leh Islam kalfawr pawlte chuan rawlrala chet nan an hmang ṭangkai ṭhin niin an sawi thung.

Israel sipaite chuan sikul an beih hma hian civil mi inhnamhnawihna nei ve lote an him theih nan theihtawp an chhuah tih an sawi a, firfiak pawl ni lo midang an awm em tih hriat nan van lam aṭanga an thlithlai bakah intelligence lam aṭangin hriattirna an ngaichang hmasa niin an sawi. Israel-in beihpui a thlakna hi Central Gaza-a Deir al-Balah leh Bureij refugee camp-ahte niin thi leh hliam tam tak an awm a ni.

US leh Qatar kaihhruaina hnuaiah inkahhai puan a nih theih nan inbiakna neih mek ni mah se Israel hian Central Gaza-ah beihpui a thlak leh a ni. Doctors Without Borders chuan Thawhlehni aṭang khan Israel beihpui thlak avang hian mi 70 thi tawhin mi 300 chuangin hliam an tuar tih an tarlanga, heng zinga a tam zawk chu hmeichhia leh naupang an ni tih an sawi bawk.