Myanmar sipaite nghaisak vangin mi 51 an thi

Myanmar-a Rakhine state-a Byai Phyu khaw mi 51 te chu kar liam ta chhung khan Myanmar sipaiten rawng taka an nghaisak avangin an thi nia sawi a ni.

Sipaite hian Arakan Army (AA) thlawptute dapin an man khawm a, an mi mante hi rawng takin an nghaisa a, an mit tuamsakin an vua a, petrol-a leihin an hal a, ṭhenkhat chu an zunte an in luih tir bawk niin he thil thleng mita hmutu ṭhenkhat chuan BBC an hrilh.

Civil sorkar aiawhtu atana din, National Unity Government (NUG) chuan sipaite nghaisakna avang hian mi 51 thiin, heng mite hi kum 15-70 inkar an ni tih a sawi. Hetih lai hian AA chuan thi zat hi 70 an chuang niin a sawi thung.

Sipaite chet dan hmutu, tualchhung mite chuan sipaite hian an mi mante chu an khuaah AA an lut em tih an zawt a, eng ang pawn chhang se kut an thlak zui vek niin an tarlang. Mipa ṭhenkhat, an bana AA thlawpna tattoo neite chu sipaite chuan chemin an tattoo chu an zai sak a, petrol leihin an hal zui tih an sawi. Khaw chhung mite chu pawnah ni hnih chhung an awmtir vek a, ei tur leh in tur tlemte chauh an pe a, mipa ṭhenkhat chu truck-a phur chhuakin an va nghaisa zui ta niin an sawi. An phurh chhuah zinga ṭhenkhat chu an chin hi hriat a la ni lo tih an sawi bawk.

Byai Phyu khua hi state capital, Sittwe bul hnai maia awm niin, in 1,000 vel nia sawi a ni. An khuaa lut sipai hi 100 an chuang niin an sawi. Sipaite hian he khua hi an la thunun a, in tam zawk chu halsak an ni tawh.

NUG chuan Byai Phyu khuaa pawikhawihna rapthlak tak thlentute chungah an phu ang rorelna lantir ngei an tum tih an sawi. Hetih lai hian sipai lam chuan khaw chhung mite an nghaisa nia puhna hi an pha thung a, sandbag bunker an hmuh avangin khaw chhung hi an endik a, boruak ṭha tak hnuaiah an kalpui a, AA zawk chuan Sittwe area aṭangin drone hmangin a rawn bei niin an puh ve thung.