Khawthlang ramte kap duh tan Russia-in a ralthuam pe phal

Russia president Vladimir Putin chuan khawtlang ramte vau nan, Russia chuan hmun hla zawk kap thei, Russia ralthuamte chu khawthlang ramte kah nan an hman tir phal tih a sawi.

Russia-in hetianga a sawi chhan hi NATO in Ukraine hnenah Russia ramchhung kah phalna a pek tak vang niah a ngaih theih. Russia chuan a ṭul a nih chuan nuclear ralthuam pawh a hmang hreh lo tih Putin chuan a sawi bawk a, tun hnaia khawthlang ramte thutlukna chuan khawvel ralmuanna a tihderthawn bakah harsatna a siam belh dawn a ni, a ti.

United States leh Germany chuan Ukraine hnena long-range ralthuam an pek hmangin Russia ram chhung hmun ṭhenkhat kah an phal sak a ni. US chuan an ralthuam pek hmangin Ukraine chuan Russia hmun ṭhenkhat an kap tawh niin a sawi bawk.

President Putin chuan khawthlang ramte chet dan ang chiaha an chet theih lohna chhan a awm lo tih sawiin, Russia ralthuamte chu khawthlang ram kah nan khawvel ram dangah an thawn chhuak dawn nge dawn lo tih chu an la ngaihtuah dawn tih a sawi. Putin chuan Biden emaw Trump emaw president atan tling mah se US leh Russia inkar chu a danglam phah dawn lo tih a sawi bawk. US president Biden hnenah Ukraie indona chungchangah lehkha a thawn tawh tih sawiin, hmalakna mumal a awm loh avangin khawthlang ramte chuan Ukraine indona chu tihtawp an duh tak tak lo niin a sawi.