Nagorno-Karabakh inremna an bawhchhe nghal

Kum tam tak ram inchuha buai tawh Azer­baijan leh Armenia-te'n inkahhai an puan chu, inkahhai ṭan ni turah bawhchhiat nghal a ni. 

Russia chuan ram pahnih inremna tur hian palai a inhuam tih sawiin an ram chuan inremna zawnga ram pahnih inbiakna thlen pawh a huam thu a sawi hnuah Zirtawpni khan ram pahnih hruaitute hi Moscow-ah an inbia a, darkar 10 lai an inbiak hnuah Inrinni aṭanga inkahhai puang phawt turin thutlukna an siam a, Azeri force-te chu an mi man inthleng turin leh Red Cross kaihhruaina hnuaia indonaa thite ruang lakna tur thlengin an sawi.

Inbiakna an neih aṭanga darkar tam pawh a liam hma, inkahhai an puan hman ṭan tur ni aṭang khan Azerbaijan leh Armenia-te chu inkahhai bawhchhiaah an inpuh nghal a, tualchhung mite chunga pawikhawihna thlenah an inpuh tawn bawk. Azerbaijan phei chuan thlawhtheihna hmangin beihpui an thlak tih an sawi zui hial a ni. Azerbaijan official lian ṭhenkhat chuan thawk lak zawkna ang a nih thute pawh vantlang hriatah an sawi nghal hial.

Azerbaijan hian Pathianni khan thu­chhuah an siamah an hmelmate chuan inkahhai an bawhchhia tih sawiin Armenian sipaite lakah Inrinni khan thlawhtheihna hmangin beihpui an thlak phah tih an sawi. Hetihlai hian Nagorno-Karabakh hruaitu pakhat chuan inbeihna chungchang engmah an hriat loh thu Reuters News Agency a hrilh ve thung. Azerbaijan hian an rama khawpui lian ber dawttu Ganja-ah Armenia hian laipui an kap tih an sawi a, zingkar hma takah an kap tih leh building-te pawh an kap fuh tih an sawi. 

Azeri Prosecutor General Office chuan mi pakua an thih bakah midang 34 an hliam tih a sawi a, hetihlai hian Armenian defence ministry chuan Azeri-in an puhna chu dawt muhlum a ni tih sawiin, Azerbaijan chu Karabakh laipui hmanga kapah a puh let thung a, chumi hmun vela khawpui lian ber Stepanakert pawh beiah a puh a ni.

Karabakh thuneitute chuan tualchhung mi panga an thi tih leh thla hmasaa ram pahnih inkara inbeihna a chhuah aṭang khan servicemen 429 an thih tawh thu an sawi ve bawk.

Ram pahnih hi an inpuh chhe tawn hle a, Azerbaijan chuan Armenia chu Minga­chevir-a Azeri hydro-electric power station rocket hmanga beiah puh bawkin an hlawhchham niin an sawi a, hei hi Ethnic Armenian force-te chuan an pha bawk.

Nagorno-Karabakh-a ethnic Armenian force hruaitu Arayik Haru­tyunyan chuan Pathianni khan Azeri force chu Hadrut lak tumah a puh a, mahse an hlawhchham niin a sawi a, tang inthleng pawh Pathiannia ṭan tur kha ni mah se an inthleng thei dawn em tih pawh a hriat tawh loh thu a sawi a ni.

Azerbaijan leh Armenian-te hi Nagorno-Karabakh chungchangah hian an buaina a rei tawh hle a, kum 1991-94 inkarah phei kha chuan nasa taka indoin mi 30,000 chuang an thih phah hial. Hemi hnu hian inkahhai puang zuiin inkahhai hi palzut zeuh zeuh mah se buaina lian tham lutuk a chhuak tam tawh lem lo. Mahse  September 27 khan nasa taka inbei lehin mi za chuang tehmeuh an thi leh a, hemi hnu hian Russia chuan ram pahnih inbiakna chu thlen a inhuam tih sawiin, ram pahnih hi kar hmasa khan an inbe ta a, September 27-a buaina chhuah hnua ram pahnih inbiak lehna hmasa ber a ni a, awmzia erawh a nei zui lem lo hle niin a lang.

Nagorno-Karabakh hi khawvel ram dang chuan Azerbaijan ramah pawm mah se ethnic Armenian tamna leh rorelna hmun a ni thung.