Tuilian vangin Sudan-ah ṭanpui ngai mi mtd 9 chuang awm
UN Food and Agriculture Organisation (FAO) chuan Sudan ramah tuilian vangin mi maktaduai kua chuang chu ṭanpui ngaiin an awm mek tih a sawi.
Kumin July thla aṭang khan ruah a sur nasa hle a, hei vang hian September khan tui lian nasa tak an tuar a ni. Blue Nile lui pawh a lian nasa hle a, kum tam tak hnua Sudan ramin tuilian an tawrh leh hmasak berna a ni. Hei vang hian sorkar pawhin state emergency a puang.
He tuilian vang hian chenna in 1,00,000 chuang chhuahsan a ngaih phah a, tuilian vanga thi hi mi 102 an awm tawh bawk.
FAO chuan tuilian hian thlai chinna ram hectare mtd chuang a chim pil niin a tarlang, thlai tam tak an chan a ni.
Tuilian hian ei leh in lamah harsatna a thlen bakah, natna hri a len palh hlauhthawnna a nasa hle. Tui len hnu hian malaria kai pawh an pun phah tawh hle a ni.
Ram chhunga ei leh inah indaihkhawp lohna a awm a, hei vang hian thil man pawh a sang chho dawn niin UN Agency FAO chuan a tarlang. Heng harsatna an tawh avang hian he rama cheng mi maktaduai kua chuangte hian ṭanpuina an mamawh hle tih FAO chuan a tarlang a ni.