Covid-19 hri ni 28 chhung a dam thei

Australia-a national science agency, CSIRO chuan laboratory aṭanga zirchianna an neih aṭangin Covid-19 hri hi pawisa note, plastic, phone screen leh stainless steel-ah ni 28 chhung a dam thei niin a tarlang.

A hmaa laboratory-a enchhinna an neihnaah khan Covid-19 hri hi pawisa note leh glass-ah ni hnih emaw ni thum emaw a dam thei nia hriat a ni a, plastic leh stainless steel-ah ni ruk thleng a dam thei niin mithiamte chuan an lo tarlang tawh a ni. 

Mahse CSIRO hian zirchianna an neih thar berah hian hri hi surface ṭhenkhat, room thim leh temperature 20C (68F) a dah a nih chuan ni 28 thleng a dam thei tih an sawi leh a ni. Hetiang hmunah vek hian flu virus chu ni 17 chhung a dam thei bawk. 

CSIRO zirchianna, Virology Journal-a tihchhuahah chuan SARS-Cov-2 chu khaw vawt aiin khaw lumah a dam rei lo zawk a, 40C-ah chuan surface ṭhenkhatah pawh hri hi darkar 24 chhung chauh a dam a ni. 

Hetih lai hian he zirchianna hi Cardiff University-a Common Cold Centre director hlui Prof Ron Eccles chuan a sawisel a, hri hi ni 28 chhung a dam thei nia sawi chu mipuite ṭul loa tihchiaina mai mai a ni, a ti. "Virus te chu mucus (taksa hnang) khuh, hahchhiau khum leh kut bala khawih aṭangin surface-ah an kai a, he zirchianna hian mihring mucus chu hri darhna angah a sawi tel lo a ni," a ti. Surface-a  mucus-ah chuan hri chu ni tam tak ni loin, darkar reilote chauh a dam theih a rin thu a sawi. 

Rutgers University-a microbiology professor Emanuel Goldman chuan July thla khan surface aṭanga hri kai chhawn theihna chu a tlem hle niin a lo sawi tawh a, kar liam tak khan University of California-a medicine professor Monica Gandhi chuan surface aṭangin coronavirus chu a darh lo tih a sawi tawh bawk. 

Covid-19 hri hi mi thiam tam takin an zirchiang reng a, hetihlai hian an zirchhuah leh ngaihdan erawh a in ang lo fo. Zirchianna hrang hrang neih reng ni mah se, hri inkai chhawn dan tak hi sawifiah hleih theih a la ni lo.