July 24-ah US Congress-ah Israel PM-in thu sawi dawn

Israel prime minister Benjamin Netanyahu chuan July 24 hian US Congress-ah thu a sawi dawn a, Gaza Strip-a Hamas nena an indo mek chungchanga thil thlen dan dik tak pawh a sawi chhuak dawn niin Republican hruaitute chuan an sawi.

Netanyahu hian House of Representatives leh Senate joint session-ah thu a sawi dawn tih House Speaker Mike Johnson leh Senate Minority leader Mitch McConnell-te chuan an tarlang.

Congress leader-te hian kar liam ta khan Israel PM thu sawi tur thu hi an sawi a, hei hi America-in Israel a thlawpna lantirna atan ti an nih thu an sawi. Hetih lai hian Netanyahu thu sawi tur hi Democrats lam chuan an helh viau rin a ni thung. Democratic lawmaker zinga a tam zawk hian Netanyahu hi an sawisel fo a, joint session-a thu a sawi turah hian pawh kal an tum loh thu ṭhenkhat chuan an sawi nghal bawk.

Tun hnaiah US president Joe Biden pawhin Gaza indona a kalpui danah Netanyahu hi langsar taka a sawisel ṭhin vangin an inkar boruak pawh hi tun hma lam a pha lo hle nia sawi a ni bawk. President Biden hian Gaza-a inkahhai puan a ni theihna tura rawtna a siamte chu kar liam ta khan a puang leh a, he rawtna hi pawm turin Netanyahu pawh a nawr a ni. Hetih lai hian Netanyahu kaihhruai sorkara tel, far-right party hruaitute chuan Biden-a rawtna siam hi a pawm a nih chuan ṭangrual sorkar aṭanga inhnuhdawhah an vau let ve thung.

US-in sikul beih chungchanga thudik sawi turin Israel phut

US chuan Gaza laili laia sikul beihna thleng chungchangah Israel chu zep nei loa langtlang taka thil sawi turin an duh tih an sawi. Thawhlehni khan Central Gaza-a sikul pakhat, chhawmdawlna in atana hman chu beih niin mi 35 in nunna an chan a ni.

Israel hian Gaza-a sikul a beihah hian Hamas firfiak pawlte tawmna hmun chiah an kap tih sawi mah se Hamas lam erawh chuan hei hi thudik lo a nih thu an sawi thung. Sikul beihna chungchanga thil sawi dan a inan loh avang hian Israel chu Hamas mi an thah takte hming mipui hriata puangzar turin a lo phut tawh bawk.

US state department thupuangtu, Matthew Miller chuan Israel hian Hamas firfiak pawl mi 20 aṭanga 30 vel sikul chhunga tawmte chu an bitum thu US an hrilh niin a sawi. Israel chuan langtlang taka thudik leh belhchian dawl an sawi zel an phut tih Miller chuan a sawi bawk. US thudawn pakhat chuan naupang 14 thah tel an ni tih an sawi a, hei hi thudik a nih chuan heng naupang 14-te hi helpawl an ni thei lo tiin, Israel chu thuchhuah neih belh zel tura an beisei thu leh mipui hriata thudik puangzar tura an beisei thu a sawi.