China-a Qingdao-ah Covid-19 test runpui nei dawn
Covid-19 hri kai thar an awm leh tak avangin, China-a Qingdao khaw pumpuiah ni nga chhungin Covid-19 test runpui neih tum a ni.
Beijing aṭanga km 700 dawn laia hlaa awm, he tuipui kam khua Qingdao-ah hian mi maktaduai kua chuang an cheng a ni. He khuaah hian October 11 khan Covid-19 hri kai thar mi paruk hmuhchhuah a ni a, mi paruk dang anmahnia natna lang chhuak lo (symptom nei lo) hmuh an ni bawk. National Health Commission (NHC) chuan October 11 khan mainland China-ah hri kai thar mi 21 an awm thu a tarlang bawk. China hian hri kai zingah Covid-19 symptom nei lo leh lang chhuak lo chu hri kaiah hian a chhiar tel lo a ni.
Qingdao Chest Hospital-ah hri kai thar hmuh chhuah a ni a, ramdang aṭanga haw a ni. Hri kai thar hmuhchhuahte hi he damdawi-in aṭanga kai chhawng nia hriat an ni. Qingdao Chest Hospital hi mipui tlawhpawh theih loha khar rih a ni a, central hospital-a emergency department pawh khar rih a ni bawk.
June thla khan food market aṭangin hri kai thar an awm leh tih hriat a nih avangin, Beijing pawh test runpui neih a lo ni tawh a ni. Hri kai thar hriat tur an la awm zel avang hian China hi Covid-19 lakah a la him bik lo hle tih a hriat a ni. Hei vang hian sorkar pawh a la fimkhur hle.
China-a Covid-19 hri kai tawh zawng zawng hi 85,578 an tling tawh a, heng zinga mi 4,634 chuan he hri hi an thihpui tawh a ni.