Sudan-ah sipai beihna vangin mi 100 chuang an thi

Sudan paramilitary, Rapid Support Forces (RSF) chuan Gezira province-a Wad al-Noura khua beiin mi 100 chuangin nunna an chan a, mi tam tak an hliam bawk.

Darfur province governor, Mini Arko Minawi chuan RSF beihna vang hian nunau leh tarte pawh thi leh hliam zingah an tel tih a tarlang. RSF hian Wad al-Noura hi laipui hmangin an bei a ni. Madani Resistance Committee chuan Nilaini zingkar aṭang khan RSF hian Wad al-Noura beih hi an ṭan tawh tih sawiin, ral lak thil tam tak an la tih an tarlang bawk.

Sudan-a sorkar lailawk ding mek chuan inbeihna thleng leh ṭhin chu pawi an tih thu sawiin, RSF chet dan dem turin khawvel ram dangte an duh thu an sawi. Transitional Sovereignty Council chuan RSF ten civil mite pawh thliar hrang loa an bei mai duh ṭhin chu pawikhawihna lian tak a ni tih sawiin RSF chu mipuite rawk ṭhinah leh tihluihnaa hmun danga sawn ṭhinah an puh.

RSF chuan thuchhuah siam vein, Sudan Army-in Jabal al-Awliya hmuna an sipaite beih an tum thu leh, hmun thum laiah Sudan Army-te chu inbei mai tura inpeihin dah an ni tih an sawi. Wad-al Noura hmun chu khawtlang lam, hmar lam leh chhim lam aṭangin an bei tih an tarlang a, an mi leh sate beih tumna awm chu an thlir liam mai mai dawn lo tih an sawi.

Kum 2023 April thla aṭang khan RSF leh Sudan sipaite hi inbeiin, RSF hian nikum December thla khan an ram khawpui Khartoum leh khaw thlang lam bialte an la a ni. Tunah hian an ram laili lamah an thuneihna zauh tumin hma an la chho leh mek. RSF leh sipaite inbeihna avang hian mi 15,000 velin nunna an chan tawh nia chhut a ni. Inremna siam tumin ṭum eng emaw zat inbe tawh mah se a la hlawhchham zel rih.