UN hotuin Myanmar sipaite chet dan a dem

United Nations secretary-general, Antonio Guterres chuan tun hnaia Myanmar siapiten Rakhine state an beihnaah civil mi eng emaw zat an that nia sawi chu a dem thu a sawi.

Tun kar tir lam khan Rakhine state-a Byain Phyu khua chu sipaite hian beiin, civil mi 70 chuang an that niin Arakan Army (AA) chuan a sawi a, mahse sipaite hian an puhna hi an pha thung. Rakhine state pumah hian phone leh internet service tihtawp vek a nih avangin, thil thlen dan dik tak hi hriatchian theih a ni lo.

UN hotupa chuan AA leh sipaite inbeihna thleng meka Rohingya mite tawrhna thleng ṭhin titawp tura a duh thu a sawi bawk. Nikum November thla aṭang khan Rakhine state-a hian AA leh sipaite hi an inbei nasa hle a, AA hian sipaite kut aṭang hian hmun eng emaw zat an laksak tawh a ni.