IDF-in Hamas mi hren pali an chhanchhuak

Palestinian firfiak pawl, Hamas-in nikum October 7-a Israel a beih thut ṭuma Israel mi 250 an hren zui tak zinga mi pali chu Inrinni khan Israel Defence Force (IDF) te chuan chhanchhuak a, hei hi ṭum khata Hamas mi hren an chhanchhuah tam ber ṭum a ni.

Israel sipai chuan mi pali an chhanchhuahte hming hi puangzarin, Noa Argamani (25), Almog Meir Jan (21), Andrey Kozlov (27) leh Shlomi Ziv (40) an nih thu an sawi. Israel hian Gaza-a beihpui a thlak mek chu chhunzawm zelin, Inrinni zinga Nuseirat an beihnaah Hamas mi hren mekte hi an chhanchhuak a, an hriselna dinhmun a ṭhat thu leh an dinhmun endik turin damdawi-in lamah hruai nghal an nih thu Israel sipaite chuan an puang.

Israel prime minster Benjamin Netanyahu chuan Israel chu firfiakte lakah tlawm a tum lo tih a sawi a,"Mi tangte an zavaia chhanchhuak turin fing leh remhre takin kan che zel ang," a ti.

Gaza-a beihpui an thlak leh mek chungchanga thuchhuah an siamah, Israel sipaite chuan an mi leh sate tana hlauhawmte chauh an bei niin an sawi a, tun hnaia beihpui an thlak kawngah an commando pakhat a thi tih an tarlang tel bawk.

Palestinian Health Ministry chuan tun hnaia Israel beihna avang hian mi 210 in nunna an chan tawh tih an tarlang a, Al-Aqsa damdawi-inah Palestinian thi mi 100 vel bawr chu dah luh tawh an nih bakah hliam tam tak phurh luh an ni bawk niin a sawi. Thi leh hliam zinga a tam zawk hi Nuseirat leh Deir al-Balah aṭanga dah luh an ni.

Gaza Strip-a indo mek, Israel leh Hamas te inkahhai puang tura an inrem theih nan US leh Qatar kaihhruaina hnuaiah inbiakna neih mek ni mah se, Israel in beihpui thlak a tharthawh leh avang hian remna a awm mai a rinawm hrih lo hle.

Hamas mi hren pali chhan chhuah an nih leh tak avang hian Hamas mi hren 250 zinga pasarih chu him takin an chhuak ta tihna a ni. February thla khan mi pahnih chu Hamas -n an chhuah a, nikum October-a indona ṭan a nih tirh khan Hamas hian mitang pakhat chu an lo chhuah tawh bawk. Israel sorkar Hamas mi hren zing 16 chu an thi tawh tih an hriatchian thu sawiin, an ruang pawh an hmu tawh niin an tarlang.

UN-in Human Rights Blacklist-ah Israel a telh dawn

United Nations chuan mihring dikna chanvo palzut ṭhin ram leh armed forces list a siamah Israel a telh dawn.

UN annual "Children and Armed Conflict" report hi June 18-ah tlangzarh tur chauh ni mah se, Israel chuan human rights blacklist-ah telh a ni dawn tih hi hriattirna a dawng hmasa a ni.

Israel prime minister Bejamin Netanyahu chuan UN thutlukna siam hi na takin a sawisel nghal a, 'Israel Defence Force (IDF) hi khawvela sipai inthunun ṭha ber a ni a, UN secretary-general ngaihdan mai maiin an nihna hi a thlak danglam lo ang," a ti. List-ah hian Hamas bakah Palestinian group dang, Islamic Jihad pawh telh an ni dawn nia sawi a ni bawk.