US-in Houthi missile leh drone kap thla

Yemen helpawl, Houthi te anti-ship ballistic missile pahnih leh drone pali kah chhuah chu US sipaiten Yemen-ah an kap thla tih an puang. Houthi helpawl hian Palestinian lam an ṭang tih lantir nan nikum November thla aṭang khan Red Sea leh Gulf of Aden-a bungraw phur lawng veivakte chu a bei ṭhin a ni.

US sipai chuan thuchhuah siamin, Houthi helpawl thununna hnuaia awm, Yemen hmun ṭhenkhat aṭanga kah chhuah UAS pakhat Bab al-Mandap Strait lam hawia kah chu US Cenral Command (USCENTCOM) chu an kah thlaksak tih an puang. Hemi bakah hian darkar 24 chhungin Houthi helpawl hian ballistic missile pali, Red Sea hawi zawngin a kap bawk tih sawiin, thi leh hliam an awm lo tih an sawi.

Houthi television channel, Al-Massirah chuan Zirtawpni khan Yemen khawpui Sanaa chu van lam aṭanga beih a nih thu a puang a, hemi chhan let nan hian Red Sea lamah missile leh drone hi an kap chhuak nia ngaih a ni. Rea Sea leh a chhehvela sumdawng lawng veivak, Houthi helpawlin an beih ṭhin hian nghawng a nei lian hle a, bungraw phur lawngte chuan kalkawng thui zawk an zawh a ngaih phah tawh a ni.