
Israel war cabinet minister Benny Gantz a bang
Israel war cabinet minister, Benny Gantz chuan Pathianni khan an party, National Union Party chuan Israel prime minister Benjamin Netanyhu-a kaihhruai ṭangrual sorkar chu an chhuahsan tih a puang.
Benny Gantz hian Gaza Strip-a indona a zawh hnua hmalak a nih dan tur atan ruahmanna mumal awm a awm loh vangin thla hmasa khan Israel ṭangrual sorkar hi chhuahsanah a lo vau tawh a ni. Sorkar chu June 8 hmaa hma a lak tumna paruk a hlawhtlin theih dan turte ruahmanna siam turin a phut a ni. Israel war cabinet minister bang ta hian Gaza-a hnehna an chan theih lawk loh chhanah Prime Minister Netanyahu chu puhin, hemi avang hian pawi ti tak chungin ṭangrual sorkar chu an chhuahsan a ngai ta tih a sawi.
Gantz hian inthlan neih thuai a duh tih sawi mah se Israel sorkar hi an party-in an chhuahsan avang hian a kehdarh mai a rinawm lo thung. An party tel lo hian ṭangrual sorkar hian Knesset-a seat 120 awmah seat 64 an la nei pha tho a ni. Gantz chuan mipuiten an rinna an nghah ngamna sorkar a din thuai theih nan inthlan neih thuai a ngai a ni, a ti. Gantz-a awmna party, National Union Party hian kar liamta khan Israel parliament, Knesset ṭhiah (dissolve) a nih theih nan leh inthlanna rang taka neih a nih theih nan bill an pu lut bawk.
National Party hi eptu lamah awm ṭhin mah se, October 7, 2023-a Hamas-ten Israel an beih hnuah emergency government hi zawmin, Gantz hi war cabinet minister atan ruat a ni a, portfolio erawh pek tel a ni lo thung. War cabinet-ah hian Prime Minister Netanyahu leh defence minister Yoav Gallant-te nen an awm a ni.
Gantz-a'n a ban thu a puan hnuah, far-right national security minister Itamar Ben-Gvir chuan war cabinet-a chanvo pe turin sorkar a phut ve nghal. Ben-Gvir hi right-wing ṭangrual sorkara tel niin, Israel-in US President Joe Biden-a'n Gaza Strip-a inkahhai puanna tura rawtna a siam a pawm a nih chuan sorkar chhuahsanah a vau ve thung a ni.
Opposition leader, Yair Lapid chuan Gantz a bang chu thiltih awm tak leh pawimawh tak a ni tih sawiin, sorkar chu thlak a hun tawh a, Israel mipuite himna pe theitu, Hamas mi hren mekte hruai haw theitu, an ram economy siamṭha theitu leh, khawvel mithmuha Israel dinhmun siamṭha leh theitu tur sorkar a din a ngai a ni, a ti.
Middle East tlawh turin Blinken zin chhuak
US secretary of state Antony Blinken chu Israel-Gaza war thleng meka inkahhai puanna tura rawtna siam hnuhnung ber pawm a nih theihna atana hma la turin nimin khan Middle East tlawh kual turin a zin chhuak.
Antony Blinken hian Egypt leh Israel a tlawh hmasa anga, hemi hnu hian Jordan leh Qatar-ah a kal leh ang. Heng ram a tlawhnaah hian US president Joe Biden-a'n Gaza Strip-a inkahhai puan a nih theih nana rawtna a siamte pawm a nih theihna turin a sawipui dawn a, United Nations Security Council (UNSC)-ah pawh he rawtna chungchangah hian vote lak an beisei bawk.
Hetih lai hian President Biden rawtna siam hi Israel leh Hamas chuan an pawm vek theih thu an la sawi lo. Pathianni leh nimin zing thleng khan Gaza-ah chuan an la inbei chhunzawm a ni.