NKorea-in ramriah aurinna a dah ve

North Korea-in an rama balloon hmanga bawlhhlawh a thawn lut chhan letna atan South Korea-in ramri bul aṭanga NKorea mipuite hriat tura aurinna hmanga thuchah a thehdarh hnuah, NKorea pawhin ramri bulah aurinna a dah ve.

Pathianni khan SKorea hian kum ruk hnuah a vawi khatna turin loudspeaker broadcast hi a kalpui leh ṭan a, aurinna hmanga a thu puan ṭhin hi chhunah km 10 bialah leh, zanah km 24 bialah a hriat theih niin an sawi. He aurinna hmang hian chanchinthar te an puan bakah, North Korea sawiselna te an ti chhuak a, South Korean pop music an play bawk ṭhin a ni.

South Korea-in aurinna a hman ṭan leh hnu hian, a thiltih chuan dinhmun hlauhawm taka a indah a ni tiin North Korea ram hotu, Kim Jong-un farnu, Kim Yo Jong chuan a sawi. Hetianga an thiltih hlauhawm tak hi chawlhsan nghal tura tiin, hei hian buaina nasa zawk a chawk chhuak thei dawn a ni, tiin a vau zui.