
France President-in EU inthlana an chak loh hnuah Parliament a ṭhiat
France President Emmanuel Macron chuan European Union parliament a France aiawh tur thlannaah an party an chak loh hnuah France Parliament lower house, National Assembly chu a ṭhiat (dissolve) tih a puang. European parliament a member 720 zinga 81 hi France thlan chhuah an ni.
National Assembly ṭhiah a nih tak avang hian mipuite chuan dan siamtu thar an thlan leh a ngai dawn a, June 30 leh July 7-ah National Assembly atana inthlan hi neih a ni ang. France president Emmanuel Macron party hi EU parliament inthlanah National Rally party an hneh lo a, Macron chuan mipuite duhthlanna an zawm theih nan hetianga che hi a nih thu a sawi.
France-ah hian kum 2022 a neih legislative inthlanah Macron a awmna party, Renaissance chuan hnehna chang mahse National Assembly-ah hian hnehna an chan loh avangin dan thar siam an harsat hle a ni. Eptu party lian, National Rally hotu Le Pen chuan Macron-a thutlukna hi an pawm tih sawiin inthlan ṭhat chu an cho tih a sawi bawk.