S Africa-in ram leisak theihna tur bill a pass

South Africa parliament chuan sorkarin rate a bithliah hmanga mimal ram a leisak theihna tur, land expropriations bill a pass. He bill hi eptu lam pawl hrang hrang chuan sawiselin, rorellai ANC chuan he dan hi dik lo takin a hmang thei dawn a ni, an ti.

SAfrica rama hi mingo-te awpna aṭanga a chhuah hnu kum 20 zet ni tawh mah se, tun thlengin ram ṭha leh zau tak tak chu mingo-te ta a la ni a, hei vang hian African National Congress (ANC) party chuan mihangte kuta ram tam zawk pek leh a ni theihna turin dan siamṭhat a ngaih thu an sawi tawh a ni.

Kumin February thla khan national assembly chuan he bill hi a lo pass tawh a, President Jacob Zuma hming ziah hnan chauh nghah a nih hnuah bill hi siamṭhat turin an thawn leh a ni.

South Africa ram hian khawkheng nasa tak an tawrh avangin sumdawngtu lam thlengin harsatna an tawk nasa hle.

Mithiamte chuan bill pass tak hi an ṭhenawm, Zimbabwe ram anga tih-luih-na leh tharum hmanga midang ram neihsakna tur a ni lo tih an sawi. Zimba-bwe ramah hian mingo ho farm eng emaw zat chu sorkarin laksakin, ram nei lo mihangte hnenah a sem a ni. Hetihlai hian sawiseltu ṭhenkhat chuan bill-ah hian ram lei leh lak a nih theih dan tur chiang taka tarlan a ni lo niin an sawi.

ANC chuan mipuite tana ṭangkai zawka hman tur ram an lak leh lei turte chu a neitu hnenah a man awm tawk, zangnadawmna pek an ni zel ang, a ti. South Africa-ah hian kum 1994 aṭang khan ram acre maktaduai 20 vela zau chu mingo kut aṭangin mihangte hnenah hlan a ni tawh a ni.