UNSC-in Gaza-a inkahhai puan a nih theih nan resolution pawm

United Nations Security Council (UNSC) chuan US put luh, Gaza-a inkahhai puan a nih theihna atana resolution lut chu a pawm. US chhawp chhuah resolution hi Thawhṭanni khan put luh a ni.

UNSC member 15 zinga 14 chuan resolution hi an thlawp a, Russia in vote a thlak lo thung.

US president Joe Biden-a'n Israel-in an pawm tawh tia a sawi, inkahhai puanna atana rawtna a siam chu he resolution hian ṭha a ti a, Hamas lam pawh he rawtna hi pawm ve turin resolution hian a beisei a ni. Israel leh Hamas chu inkahhai puanna tura rawtna siama tihtur zamte rang taka ti turin resolution chuan a phut bakah, thu delhkilh nei lo turin a duh bawk.

US-in a chhawp chhuah inkahhai rawtnaah hian Israel leh Hamas chuan indona tiamchin awm loa an tihtawp a phut bakah, Hamas mi hren chhuah a phut bawk. Hemi bakah hian mi tang thi tawhte ruang pek kir leh Palestinian mi tangte chhuah zalen a phut a ni. He inremna hi Israel leh Hamas in an pawm a nih chuan chhawng thuma tihhlawhtlin tur a ni ang.

Hamas hian midang kaltlangin resolution-a an mipui duhdan leh thil ngiat nena inremte tihhlawhtlin nan inbiakna neih an duh tih an tarlang. UN-a Israel palai chuan Hamas ten remchanga an hman theih tur inbiaknaah Israel chu a tel dawn lo tih a sawi ve thung.

President Biden-a rawtna siam hi pawm ngei a nih theihna atana hma la leh nawr turin US state secretary Antony Blinken chu Middle East tlawh kual turin a zin chhuak mek. Thawhṭanni khan Israel tlawhin, prime minister Benjamin Netanyahu chu he rawtna hi pawm turin a nawr a ni.

South Gaza-a inbeihnaah Israel sipai 4 an thi

UNSC-in inkahhai puang turin resolution pawm tawh mah se Israel chuan Gaza a beihna a tihtawp phah lo a, Gaza khawpui a chenna in pakhat a kah vangin mi 11 an thih belh leh tawh nia tarlan a ni.

Hetih lai hian Israel army chuan Gaza chhim lama Hamas nena an inbeihnaah an sipai pali an thi tih nimin khan an sawi.

Thuchhuah an siamah, Israel sipai chuan June 10-a Rafah-a building pakhata bomb tihpuahah an sipaite hi an thi tih an tarlang. Heng mite nen, nikum October 27-a Israel sipaiten khawmual lama Gaza Strip-a beihpui an thlak hnua an sipai nunna chan hi 298 an tling ta a ni.

Hamas armed wing, Ezzedine al-Qassam Brigades chuan Rafah-a bomb tipuaktu hi an fighter-te an nih thu an sawi ve nghal bawk. "Building chhunga Zionist force-te awm laiin Qassam mujahideen chuan bomb hi an tipuak a ni," an ti. Israel sipai zingah thi leh hliam tuar an awm tih an tarlang.