Nigeria-ah armed gang-in mi 25 kap hlum

Nigeria ram hmar thlang lam,Katsina state-a Yargoje khua chu armed gang-in beiin mi 25 an kap hlum a, mi dang eng emaw zat an ru bo bawk.

State commissioner for security affairs, Nasiru Babangida Mu'azu chuan armed gang, tualchhung miten bandit tia an sawite hi motorbike eng emaw zat nen khaw chhungah hian tlan lutin, tualchhung mite chu an pawng kah niin an sawi. Hemi hnu hian dawrte an rawk zui bawk. Tualchhung mite chuan bandit ho beihnaa thi hi mi 50 an tlin an rin thu an sawi a, ruang ṭhenkhat chu hmuh an la ni lo tih an sawi. An kah hlum zingah hian hmeichhia leh naupangte pawh an tel a ni, an ti.

Kum 2020 December thla khan armed gang chuan Kankara khaw daia boys's secondary boarding school beiin zirlai 300 chuang an lo ru bo tawh a, Katsina state sorkarin inbiakna a neihpui hnuah zirlaite hi chhuah an ni. Kumin March thla khan Katsina state-ah vek hian chhun khaw en laiin mi tam tak ruk bo an lo ni tawh bawk.