Thailand-a bazar kangah ramsa tam tak an thi

Thailand khawpui Bangkok-a bazar lar tak, Chatuchak bazar chu nimin khan a kang a, dawr 100 chuang kang chhiain ramsa khawi 1,000 vel an kang hlum. Kangmei hi zingkara chhuak niin, ramsa zawrhna dawr 100 chuangte chu rang takin a kang kai niin an sawi.

Kangmei chhuah chhan hi current short circuit vang a ni tih thuneitute chuan an sawi a, hriat theih chinah mihring thi leh hliam erawh an awm lo. Hetih lai hian bawm chhunga khung ramsa erawh tam tak an kang hlum a heng zingah hian sava, ui, zawhte, rul, sazu, saphai leh geckos te an tel. Thuneitute chuan kangmei ṭhelh nan hian darkar khat chuang hun an hmang tih an sawi a, kangmeiin a tihchhiat zawng zawng hlut zawng hi an la hre mai thei lo tih an sawi bawk.

Chatuchak hi South East Asia-a bazar lian ber pakhat niin Thailand-a kartawp bazar lian ber leh lar ber a ni bawk. Kartawpah hian khualzin nuai 2 chuangin an tlawh ziah anga tarlan a ni. Chatuchak bazar-ah hian section 27 awmin, heng zinga section paliah hian ramsa khawi tur emaw eitur emaw zawrh niin kartawp chauh ni loin kartluanin an inhawng a, hemi a nih avang hian tuna bazar kangah pawh hian ramsa kang hlum an tam phah a ni.