Olympic Games sawn tura rawtna hnawl

Brazil rama hri leng mek, Zika vanga kumina Summer Olympic Games an thlen tur hmun danga sawn emaw, Games neih hun tur sawn hlat rawtna chu World Health Organization (WHO) in a hnawl a, Brazil health official-te pawhin he rawtna hi an thlawp loh thu an sawi.

International expert 150 chuan thosi seh aṭanga natna inkai theih, Zika hri leng avang hian WHO hnenah open letter an thawn a, Brazil rama khawpui zinga Zika hri len nasatna zinga mi, Rio de Janeiro-a Games neih tum chu thil tihawm lo tak nia an ngaih thu an sawi. Open letter thawnnaah hming ziaktu zingah hian US, Britian, Canada, Norway, Philippines, Japan, Brazil, South Africa, Turkey leh Lebanon rama expert-te an tel. An lehkhaah hian an ngaihtuah ber chu khawvel pum huap a ni tih sawiin, Zika hri lengin hriselna lama harsatna a thlen dan chu a hma pawhin an chhut thei lo tih an sawi a, Games neih hunah hian ram hrang hrang aṭangin mi tam tak an kalkhawm dawn a, hri leng hi nasa takin a darh phah thei dawn nia a ngaih thu an sawi.

Zika virus hian nu naupaiin a vei chuan a naute chu nausen piangphung pangngai aia lu leh thuak a te zawk a, hei bakah hia a mit lamah pawh nghawng ṭha lo a nei thei nia rin a ni bawk. Zika virus hian puitlingah pawh rilru lam harsatna a thlen thei bawk.

Nikuma Brazil rama Zika virus hmuh a nih aṭang khan nausen piangphung dik lo hi 1,300 vel an piang tawh a ni.

WHO chuan Olympic Games-a tel tur leh chhim tumte tan a him niin a sawi a, hemirual hian Brazil rama kal tumte chu thosi seh laka invenna tur keng turin an chah nghal a ni. Naupai laite chu Zika hri lenna bialte pumpelh hram turin an ngen thung.

Summer Olympic Games hi August 5-21 chhung hian neih a ni dawn a, Brazil health ministry chuan Games neih hun tur hian ramah thlasik a nih chhoh tawh dawn avangin hri leng pawh hi a ziaawm chho tawh dawn niin a sawi.