Donald Trump-a rally-ah buaina chhuak

US Republican president nominee, Donald Trump-an San Diego, California-a rally a neihah amah thlawptu leh eptu lamte an intibuai a, mi 35 man an ni.

June 7-a California primary electoin neih tur atan Trump hian kar kalta Inrinni khan Mexico ramri bul khawpuiah rally hi huaihawt a ni.

Trump hian a hmain Mexico ram aṭanga an rama dan loa pem lut ṭhinte dan nan ramri-ah indaidanna bang siam a rawt bakah, Mexico aṭanga US-a lutte chu suahsualna chi hrang hrang pulutah a puh bawk.

San Diego khawpuia cheng zinga hmun thum≠a ṭhena hmun khat hi Latino an ni a, Mexico aṭangin dan loa ramri kana khawpuia lut hi nitin mi eng emaw zat an lut reng bawk a ni.

Donald Trump hian President thlanna neih turah hian Republican party nominee ni tura delegate mamawh zat nei tur mah se official-a puan a la ni lo a, July thlaa party convention neih hunah tihfel chauh a ni ang.

Trump hian November thlaa US President thlanna neih tur atana a senso tur a tuaknaah dollar maktaduai ruk a hmu a, dollar maktaduai li pek tiamtu an awm bawk. Trump hian inthlan campaign senso atan dollar maktaduai 40 chuang hman a tum thu a sawi a, a sensor tur tuakna atan hian vawikhatna atan sumdawnna lama a thawhpui, Rachelle leh Tom Barrack-te inah ṭhutkhawm a buatsaih. He ṭhutkhawmah hian mi 100 chuang an tel a, amah leh Republican National Committee Chairman, Reince Priebus-ten thu an sawi a, he huna telten Trump-a tana sum an thawh khawm hi dollar maktaduai ruk zet a tling a ni.