Nepal-in budget atan dollar tld 10 ruahman

Nepal sorkar chuan kum 2016-17 atana an ram budget kar kalta Inrinni khan a pharh a, kumin budget hi kum hmasa lam aiin 28% zetin a sang a ni.

Nepal Finance Minister Bishnu Prasad Paudel chuan political party hrang hrang, finance minister hluite leh stakeholder-te a biakrawn hnuah budget hi a buatsaih tih a sawi.

Budget tharah hian sorkar hnathawkte hlawh 25% a tihsan rawt a ni a, hei bakah hian ram Danpui thar kalpuina tura ruahmanna te, hmasawnna hna thawk mek chak zawka kalpuina tu te, lirnghingin thil a tihchhiatte siamṭhat hna chak zawka kalpuina tur leh retheihna umbona tura hmalaknate chu dah pawimawh a ni.

Sorkar sum senral tur zinga 30% zet hi ramdang aṭanga ṭanpuina an hmuh te leh loan an lakahte a innghat dawn a ni.

Kum 2015, April thlaa magnitude 7.8-a naa Nepal rama lirnghing vang khan mi 9,000 dawn an thi a, thil a tichhe nasa hle bawk. Tun thlengin mi sing tel chu sorkarin an awmna lailawk a siamah an la khawsa zui a ni.

Finance Minister chuan an budget aṭang hian lirnghingin thil tihchhiatte din thar lehna atan dollar tluklehding≠awn khat dah a ni tih a sawi. Hetihlai hian lir≠nghingin thil a tihchhiatte siamṭha leh vek tur hian dollar tluklehdingawn 8.4 vel zet an mamawh dawn nin a sawi.