Israel Defence Minister atan Lieberman la lut

Yisrael Beitenu party hruaitu, Avigdor Lieberman chu Israel Defence Minister atan lak luh a ni ta.

Prime Minister Benjamin Netanyahu-an defence minister atana Lieberman a rawtna hi parliament, Knesset-ah ngaihtuah niin member 55-in an thlawp a, member 45 in an duh lo thung. Vote laknaah hian member 21 an tello a, member pakhat a hai bawk.

Kum 57 mi, foreign minister hlui, Lieberman hian Defence Minister atana lakluh a nih hnua thu a sawiah, Defence a enkawl dawn avanga hlauhthawnna neite chu hlauthawng lo turin a hrilh. "Prime Minister thusawi engkim ka ngaithla a, ka pawm bawk a ni. State pahnih siam tur chungchang pawh a tel a ni" a ti. Lieberman hi Palestinian state hran siam dodal tlat ṭhin a nih avangin defence minister atana dah tum a nih pawh hi sawiseltu tam tak an awm a, Palestinian nena an inkar boruak a chhiat zual phah an hlauh thu an sawi a ni.

Lieberman chuan state pahnih dinna tur chu a thlawp thu a sawi bakah, Egypt President Abdel Fattah al-Sisi-an Israel-Palestinian inremna kawng zawnga inbiakna neih thar leh a rawtna pawh chu lawmawm a tih thu a sawi bawk.

Yisrael Beiteinu Party-in ṭangrual sorkar a zawm ve leh tak avang hian Prime Mi≠nister Benjamin Netanyahu hian Parliament member 120 awmnaah thlawptu 66 neiin, majority a nei thei dawn ta a ni.

Eptu pawl, Zionist Union hruaitu Isaac Herzog chuan sorkar siamtu party zingah right-wing party Yisrael Beitenu telh a nih tak avangin Kulanu party hotu, Finance Minister Moshe Kahlon chu minister a nihna aṭanga bang turin a ngen. Kalanu party hian sorkar an thlawpna hi an hnukdawk a nih chuan Netanyahu hian majority a nei pha dawn lo a ni.

Netanyahu hian ṭangrual sorkar siampui turin Herzog hi inbiakna pawh a lo neihpui tawh a, mahse an inbiakna a hlawhtlin theih loh avangin Lieberman tan kawng a inhawng ta zawk a ni. Herzog chuan PM hi bei letin, sorkar pawh a thununna hnuaia a awm tawh lo a, right-wing hoin an duh duha an nawr kual theih a ni tawh a ni, a ti.