Japan eptu party-ten sorkar ring tawk lo

Japan rama eptu party lian pali-te chuan Prime Minister Shinzo Abe-a kaihhruai sorkar an rin tawk loh thu sawiin, lower house-ah resolution an thehlut.

Eptu party te hi Democratic Party, Japanese Communist Party, Social Democratic Party leh People's Life Party-te an ni a, PM Abe-a cabinet chu chhiah lak tihsanna tur ṭum hnih zet a tikhawtlai tawh avangin economic policy dik tawk loah mawhphurhtuah an puh a, sorkar siam zui zel tlakah an ngai lo tih an sawi. Prime Mi≠nister chu bang turin an phut nghal bawk.

Abe-a kaihhruai sorkarin chhiah lak tihsanna tur a vawi hnihna atana a tikhawtlai leh chuan a economic policy hlawhchham zia a lantir a ni, an ti. Kum 2014 kumtawp lam khan sales tax-a 8% lak ṭhin 10%-a tihsanna tur chu Abe hia a lo tikhawtlai tawh a ni.

PM hian kar kalta Inrinni khan chhiah lak tihsan tur hi kum hnih leh a chanve atan tihkhawtlai a, kum 2019 October thla aṭanga hman ṭan chauh a lo rawt tawh a, vawiin hian tihkhawtlai a nih thu hi a puan rin a ni.

Finance Minister Taro Aso chuan chhiah lak dan thar tihkhawtlai a nih dawn chuan PM hian Parliament lower house chu a ṭhiah a, inthlanpu buatsaih duh leh duh loh chungchangah mipui ngaihdan a lak a ngai ang, a ti. Eptu party-te pawhin PM hian inthlan ṭhat a duh a nih chuan an inpeih reng thu an sawi bawk.