UNSC resolution chungchangah Hamas-in a ngaihdan a sawi

United Nations Security Council (UNSC)-a US put luh, Gaza-a inkahhai a awm theih nana resolution pawm tak chungchangah Hamas lamin an ngaihdan an sawi tih inkahhai puan a nih theih nana palai hna thawktu, Qatar leh Egypt chuan an tarlang.

Hamas leh Islamic Jihad (PIJ) chuan thuchhuah inṭawm siamin, Israel-in Gaza a beihna tihtawp chu an ngaihpawimawh ber a nih thu leh, inkahhai chungchang sawi ho tura an inhawn thu leh inremna siam an hreh loh thu an sawi. Hamas official Osama Hamdan chuan Israel nena an inkara palai hna thawktute bulah inkahhai puan a nih theih nana rawtna siam chungchanga an ngaihdan an hrilh hre tawh tih a sawi.

Hamas hian Gaza-a Israel beihpui thlak mek titawp chu inremna chuan keng tel ngei se an duh a, Israel sipaite chuan Gaza an chhuahsan an duh tih an sawi bawk. Hamas hian Gaza din thar leh phalna bakah mi tang inthleng chu inremna chuan a ken tel a ngai tih an tarlang bawk a ni.

Qatar leh Egypt foreign ministry chuan inkahhai chungchanga Hamas ngaihdan an dawn hi an zirchiang mek tih sawiin, US nen ṭangrualin Israel leh Hamas in inremna an neih theih nan a tawp thlengin hma an la dawn tih an tarlang. White House national security thupuangtu, John Kirby chuan Hamas chhanna hi an dawng tawh tih sawiin US pawh hian an la zirchiang mek a ni, a ti. Middle East tlawh kual tura zin mek, US secretary of state Antony Blinken chuan Hamas lamin resolution an thlawp chuan beiseina a siamsak thu a sawi a, hemi rual hian US thil tum pakhat chu Hamas-te hneh a ni, a ti. 'Hamas-te hian Gaza hi eng kawng maha an thunun tawh lohna turin political plan leh humanitarian plan fel tak a awm a ngai a ni,' a ti.