Denmark-in Korean ramen a thak lutuk vangin lak kir tir

Denmark chuan South Korea company, Samyang siam spicy ramen noodle eng emaw zat chu a thak lutuk vangin a lak kir tir a, cosumer-ten an eisual a hlauhawm thu a sawi.

Denmark food agency chuan hriattirna hi ti chhuakin, consumer-te chu spicy noodle an lak kir tirte ei lo turin an chah bawk. Spicy noodle an lak kir tirte hi Buldak 3x Spicy & Hot Chicken, 2x Spicy & Hot Chicken leh Hot Chicken Stew-te an ni.

Danish Veterinary and Food Administration chuan thuchhuah sawmin, DTU Food Institute in a enfiahnaah, heng noodle packet pakhata a thak zawng, capsaicin level chu a sang lutuk a, consumer-ten poisoning an neih theihna a sang tih a sawi. Capsaicin level hi a san lutuk chuan lu hai, luak chhuak, pum leh kaw ṭha lo thlengin a thlen thei a ni. Thuneitute chuan heng spicy noodle an sawite hi lo lei lawk an awm pawhin ei tawh lo tura hrilhin, paih emaw, an leina dawra kir leh emaw turin an hraittir.

Hetih lai hian Denmark sorkar thutlukna siam hi spicy food duhtu lamin online lamah an sawisel thung a, Denmark mi chu a tlangpuiin thak ngam lo an nih vang zawk nia sawiin, spicy noodle chu an ei ngam loh vangin poison ang hialah an ngai titein an sawi.

Samyang hi South Korea-a food manufacturer lian tak niin, an company hian an rama instant noodle siam hmasa niin an insawi a, 1960 chhoah khan an siam ṭan a ni. An noodle siam zinga mi, Buldak instant noodle line hi kum 2012 aṭanga an siam ṭan niin, an thak ṭhat em avangin 'fire noodles' tia sawi a ni a.