Joe Biden-a fapa thiam loh chantir

US president Joe Biden-a fapa, Hunter Biden chu silai a lei dawna dawt a sawi kaihhnawiha thubuai pathum siamsakah, member 12 awmna jury chuan thiam loh an chantir.

Kum 54 mi, Hunter Biden hi US President ṭanglai fapa zingah thubuaia thiam loh chantir hmasa ber a ni.

Kum 2018 khan Hunter hian silai, Colt Cobra .38-caliber revolver a lei a, hetih hunlai hian US-a mimalin silai a lei dawn chuan form fill up a ngai a, ruihhlo a khawih leh khawih loh chungchang zawhna chhan tur pawh a awm. Hei hi Hunter hian 'no' tiin a chhang a, mahse hetih lai hian ruihhlo a khawih a ni. Silai leina tura dawt a sawi kaihhnawihah hian kum 2023, September thla khan thubuai pathum siamsak a ni. Hunter hian a thubuaiah hian tih dik lo a nei lo niin a ṭang a, mahse a nupui hlui, bialnu hlui leh a nupuia laizawnte thu an zawh telnaah, a silai lei hun lai, 2018, October thla hian ruihhlo ngawl a vei tih an sawi vek a ni.

Hunter Biden hremna tur hi tih chhuah a la ni lo a, a thubuai hmasa berah hian kum 10, a pahnihnaah kum 5 leh a pathumnaah kum 10 thleng lung-in tantir theih a ni ang.

Delaware-a Hunter Biden chungthu ngaihtuahnaah hian a pa, President Biden chu a awm ve lo a, mahse a nu, First Lady Jill Biden leh a nupui, farnu leh a chhungte dang erawh an tel. Jury-te thutlukna puan a nih hnuah President Biden pawhin Wilmington, Delaware hi a pan nghal a ni. 'President ka ni a, mahse pa ka ni bawk. Jill nen kan fapa kan hmangaih em em a ni," tiin jury-te thutlukna siam erawh chu a zah thu a sawi a, mahse Hunter chuan appeal a tum tih a sawi bawk.