Argentina President reform package duh loin nawrh huaihawt

Argentina Senate chuan sawisel hlawh tak, President Javier Milei-a'n economic reform package a siam chu Nilaini khan an pawm a, hei hi duh loin mipuiten Buenos Aires-ah nawrh an huaihawt. Pungkhawmte leh riot police-te chu Congress kawtah an innawr buai a ni.

Buenos Aires-a nawrh huaihawtte chuan President reform package siam hian Argentina mipui maktaduai tel tan harsatna a thlen dawn tih an sawi a, an nawrh na hmunah petrol bomb leh lung te an hmang a, motor eng emaw zat an hal bawk. Riot police-te hian pung khawmte hnawh darhna atan hian tear gas, rubber bullet leh water cannon te an hmang ve bawk.

Nawrh huaihawtnaah hian eptu hruaitu pawh eng emaw zat an tel a, an zinga pakhat Juan Manuel Pedrini chuan hliam tuarin, damdawi-inah dah a ni. Buaina chhuak kaihhnawihah hian mi 18 man an ni. Heng mite bakah pawikhawhna thlentute pawh zawn chhuah vek an tum tih official-te chuan an sawi.

President Milei-a package siam hi an ram economy siamṭhatna tura a ruahman, 'Law of Bases'-ah hian an rama inrenchemna kalpuina tura state of economic emergency puanna tur a tel a, hei bakah pension tihtlem leh public industry privatise-na tur pawh a tel. Milei hi right-wing economist niin, an ram sum dinhmun chhiat karah President atan hian thlan tlin a ni. Argentina sum dinhmun hi a ṭha lo hle a, an rama thil man sanna pawh hi 300% zet a tling tawh a, an ram mipui zahve aia tam chu rethei takin an awm mek an ni.

Economy siamṭhatna tura President ruahmanna siam hi eptu party bakah labour union leh social organisation-te chuan an dodal nasa hle. Senate-a vote lakah pawh 36-36 in a thlawptu leh dodaltu an in zat a; head of chamber, vice president Victoria Villarruel chuan a thlawp lamah vote-in pawm a ni thei ta a ni. He bill hi chipchiar taka zirchian leh vek a nih hnuah, lower house-ah ngaihtuah tura thawn let lehin, hemi hnu hian a taka hman a ni theih tawh ang.