Indona leh a kaihhnawih vanga raltlan mi mtd 120 an awm : UNHRC

United Nations High Commissioner for Refugees (UNHRC) chuan indona leh a kaihhnawih vangin khawvel pumah raltlan mi maktaduai 120 an awm tih an tarlang. Raltlan an pung zel chu khawvel dinhmun ṭhat lohzia tichiangtu a ni, an ti bawk.

UNHRC chuan Gaza, Sudan leh Myanmar-ahte indona a thlen avangin mi tam takin an chenna hmun an chhuahsan phah an ti a, Japan mipui zat raltlan an awm mek tih an sawi. Indona, buaina leh tihduhdahna tawrh vanga raltlan chu a tam ber an nih thu UN refugee chief Filippo Grandi chuan a sawi a, a huhoa mipui sawn chhuah a nih chhan lian ber chu indona vang a ni tih a sawi bawk.

Khawvel puma raltlan awm zat hi kum 2012 aṭang khan a pung chho zel tih UNHRC chuan an tarlang a, nikum khan raltlan hi mtd 110 awm anga chhut a ni. Grandi chuan indona bakah sik leh sa inthlak danglam vanga chenna hmun chhuahsan an awm tih sawi bawk. UN refugee chief hian khawvel politics a inthlak danglam lo a nih chuan buaina vanga raltlan hi an pun belh zel dawn a ni, a ti.