Kuwait-a kangmei chhuakah mi 49 an thi

Kuwait-a ram dang mi hnathawkte chenna building chu Nilaini khan a kang a, mi 49 in nunna an chan. Thi zinga mi 40 hi India khua leh tui an ni a, hliam tuar mi 50 vel an awm bawk.

Kangmei hi Kuwait khawpui aṭanga chhim lama khaw pakhat, Al-Mangaf a chhuak niin Kuwait deputy prime minister Sheikh Fahad Yusuf Saud Al-Sabah chuan hetiang chhiatna rapthlak tak an tawh chhan chu in neitute duham luat vang a ni, a ti. Building pakhata cheng tura bituk aia tam an chen tir ṭhin a, hemi avang hian tum ṭum chhiatnaah pawh thi leh hliam an tam phah niin a sawi. Emir Sheikh Meshal al-Ahmad al-Sabah chuan kangmei chhuah chhan chhui chiang turin thu a pe tawh tih sawiin, official thiam loh chang an awm a nih chuan hrem an ni dawn a ni, a ti.

Al-Mangaf a kangmei chhuak hi Nilaini zing dar 6 khan thuneitute hnenah hriattir a ni a, kangmei hi ṭhelh tuma theihtawp chhuah a nih hnuah an ṭhelh mit thei chauh a ni. Kuwait interior ministry chuan mi 49 an thi tawh tih an tarlang a, ruang zawn hna an la kalpui reng tih sawiin ruang an hmuh tawhte pawh an nihna hriat tuma an beih mek thu an sawi. Police commander pakhat chuan thi zinga tam tak chu meikhu vang a nih thu sawiin, mi enge maw zat an chhan hman bawk tih a tarlang.

India prime minister Narendra Modi chuan chhiat tawk chhungkuate a tawrhpui tih sawiin, hliam tuarte pawh an dam leh thuai theih nan a ṭawngṭaipui reng tih a sawi. Kuwait Indian embassy chuan chhiatna thlenna hmun chu an thlithlai reng a, kangmei tuarte puih nan Kuwait thuneitute nen an ṭangrual a ni, Modi chuan a ti. Congress hruaitu Rahul Gandhi pawhin mitthi chhungte a tawrhpui thu tarlangin, tun hnai mai khan Israel-ah India mi an thih bawk avangin India khua leh tui, Middle East-a inhlawh tura kalte himna chungchang chu ngaihtuah ṭhat a ngai hle tih a sawi.