Trump-a'n Covid-19 a kai tawh lo

US president Donald Trump chu hun eng emaw chen Covid-19 a kai hnuah Thawhṭanni khan amah enkawltu, American physician Dr Sean Conley chuan hri a kai tawh loh thu a sawi.

October 1 khan Trump leh a nupui Melania Trump chuan hri an kai tih hriat a ni a, Trump hi October 2 khan Maryland-a sipai damdawi-in, Walter Reed National Military Medical Center-ah ni li chhung enkawl zui a ni a, October 5 khan damdawi-in aṭanga chhuakin White House-ah enkawl zui a ni. 

October 7 khan Trump chu a office, Oval Office-ah hna a thawk chhunzawm leh ṭan a, hetih lai hian hri a la kai a, mahse a hriselna chu a ṭhat thu leh ngaihtuahawm a nih loh thu a sawi. Hri a kai chhung zawnga a inkhunghran nghal avang leh US Centers for Disease Control and Prevention siam data and guidelines chu a zawm ṭhat avangin, Trump hian midang hri a kai chhawng lo niin  Dr Conley chuan a sawi. 

Hri a kai tawh loh avang hian US election an hmachhawn tur atan Trump hian Thawhṭanni khan Florida khuaa Orlando Sanford International Airport-ah Make America Great Again rally a ṭan leh nghal a, a dam hnua a campaign leh hmasak berna a ni. He rally hi neih a nih hma hian Dr Conley chuan Trump hian a ni zawna test a neihah Covid-19 a kai tawh lo tih finfiah a nih thu a sawi a, Abbott Laboratory-ah test neih a nih thu a sawi bawk. 

Florida state-a campaign a neihnaah hian Trump chuan amah thlawptu mipuite hnenah 'bif fat kiss' a pek theih nan hmaituamna phelh lawk turin a hriattir. Hemi chungchangah hian a kingpui Joe Biden chuan hri leng karah hetianga thil tih hi tihdan phung ṭha lo a nih thu a sawi. 

Trump hian Pennsylvania, Iowa, North Carolina leh Wisconsin-ah campaign a nei chho leh dawn bawk a ni. Inthlan an neih tur atana national opinion poll lak hnuhnun berah kum 2016 inthlan Trump chet ṭhatna, Wisconsin leh Pennsylvania-ah Biden hi duhtu an tam rih zawk a, hei vang hian Trump chuan campagin hi beih ngawrh chhoh a tum hle.