Kim Jong-un-a'n sipaite lawmthu a hrilh

North Korea ram hotu Kim Jong-un chuan rorellai, Worker's Party din champha vawi 75-na lawmna, kar liamta Inrinnia neiha thu a sawiah, an ram sipaite chu lawmthu hrilhin ram mipuite dinhmun chawikanna tura sorkar hmalakna ṭha tawk loha ngaihdam a dil nghal bawk. 

State television station chuan Kim thusawi hi a ti chhuak a, thu a sawi lai hian Kim hi a lung pawh a chhe hial a ni. 

Thlipuiin chhiatna a thlennaa sipaiten chhanchhuah leh chhawm­dawl hna an thawh dan te, an rama hripui leng tur venna kawnga an hmalaknate avangin Kim chuan sipaite chungah a lawm hle tih a sawi. North Korea mi zingah hri kai an la awm loh vangin lawmawm a tih thu a sawi bawk. 

Hripui laka invenna tura khuah­khirhna siam te, ram dangten an hrekna avang leh thlipuiin chhiatna hrang hrang a thlen avangin sorkar chuan mipuite dinhmun chawikanna tura a lo tiam tawh pawh tihhlawhtlin theih lohin a awm tih Kim chuan a sawi a, pawi a tih thu a sawi rualin an ram mipuiten amaha rinna nghatin, a thutlukna siamte pawh an thlawp zel a ni, a ti.